CEBU CITY, Cebu Aug. 22 (PIA) -- Andam na ang tanan alang sa umaabot nga pag-abli sa SY 2023-2024 karong Agosto 29, kini mao ang pagsiguro sa Department of Education (DepEd) Region 7.
Anaa na sa saktong kahimtang ang mga eskwelahan lakip na ang classrooms, chairs, ug uban pang butang nga gamiton alang sa klase butyag sa DepEd base sa ilang uwahing monitoring sa kabahin sa kaandam sa mga tunghaan dinhi sa Central Visayas.
Dakong nakatabang usab sa pagpangandam alang sa pag-abli sa klase mao ang gipahiyagon nga Brigada Eskwela gikan Agosto 14 hangtod 18 nga giapilan sa mga ginikanan, partner agencies, non-government organizations, uniformed personnel, ug uba pang education stakeholders.
Ang 20 ka nga school division offices sa rehiyon mipadayag nga nagmalampuson ang pagpahigayon sa Brigada Eskwela ngadto sa ilang mga nagkadaiyang mga tunghaan.
"Even if we lack some facilities, like we lack classrooms, we lack teachers and chairs but we are always ready, our schools are always ready to accommodate and facilitate our learners," sigon ni DepEd-7 Regional Director Salustiano Jimenez
“We’re so happy kay tungod sa atong Brigada Eskwela ang atong mga eskwelahan at least ma ready na gyud comes the opening of classes this August 29, nalipay ta ana kay daghan kaayo mga stakholders nga mitabang pud," dugang ni Jimenez.
Base sa uwahing datos sa DepEd-7, anaa na sa 1.2 milyon ka nga learners ang nagpa enroll alang sa umaabot nga bag-ong school year, kini misaka gikan sa 499,000 enrollees sa wala pa napahigayon ang Brigada Eskwela.
Matod sa ahensya, ang maong kalihokan gigamit usab sa nga parents og guardians aron nga ipa enroll ang ilang mga anak nga maoy hinungdan sa pagdugang sa kadaghanon sa mga nagpa-enroll.
Ug bisan pa man nga wala nay mga Covid-19 restrictions nga ipatuman, apan gidasig gihapon sa DepEd ang mga tinun-an, ginikanan, ug mga magtutudlo nga magbinantayon aron nga malikayan ang mga sakit ug uban pang kakulian sa panglawas.
Gipahimug-atan sa ahensya ang pagsulob og facemask kung gikinahanglan ug sa dili pag sulod sa klase kung nakasinati og hilanat og ubo.
Samtang, ipatuman usab sa DepEd ang Oplan Balik Eskwela kung diin adunay silay ipangbutang nga mga helpdesk sa matag school division offices, eskwelahan, og sa ilang regional office nga mahimung maduolan sa mga ginikanan alang sa ilang mga concerns kabahin sa enrollment ug uban pa.
"Sa atong mga ginikanan ug sa atong mga private and public schools if you have some issues and concerns regarding your enrollment, your forms that's not being released by schools or whatever issues and concerns related to your children's education as long as they are part of the basic education you can visit our office, we have a team here who will facilitate and accommodate you all," awhag sa hepe sa DepEd-7.
Mamahimu usab sila mobisita sa DepEd-7 regional website https://region7.deped.gov.ph/, aron nga ipadangop ang ilang nga concerns ug uban pang pangutana kabahin sa pag-abli sa klase ug sa edukasyon sa ilang mga anak ug estudyante. (RGC/PIA7 Cebu)
Comments
Post a Comment