CEBU CITY, Cebu, August 30 (PIA) -- Gihulagway sa Department of Education Region 7 (DepEd7) ang pag-abli sa klase niadtong Agosto 22 alang sa school year 2022-2023, isip hapsay ug malinawon.
Sa gipahigayon nga Media Forum niadtong Agosto 26, gibatbat sa ahensya nga nagmalampuson sa kinatibuk-an ang pagsugod sa klase sa mga nagkadaiyang tunghaan sa Central Visayas.
“Our assessment on the start of classes last August 22, the schools opening was generally smooth, orderly, and peaceful with the help of all stakeholders, LGUs, NGOS, barangay officials, and other agencies” saysay ni DepEd7 Regional Director Salustiano T. Jimenez.
Matod usab sa DepEd7, wala silay nadawat nga dakong problema sa adlaw sa pag-abli sa klase kung diin kadaghanan sa mga napadangat kanila anaa sa ginagmay nga mga isyu nga may kalambigitan sa enrollment daw susama kini dali nilang nahatagan ug kasulbaran.
Usa ka semana sukad nga nagsugod ang klase, ang DepEd7 miingon nga anaa na sa 1,999,363 ka mga indibidwal sa rehiyon 7 ang nag pa enroll aron nga motungha sa bag-o nga school year.
Kabahin niini, ang ahensya nagtuo nga sa sunod semana ilang makab-ot ug maapsan ang ilang tinguha nga 2 ka milyon ka mga enrollees karong tuiga.
“DepEd can still accommodate enrollment especially if nay valid reason of the delay. We are hoping that the data of enrollment we got during the first week will increase for the coming days” dugang ni DepEd7 Assistant Regional Director Cristito Eco.
Gimanduan na usab ni RD Jimenez ang mga school superintendent sa Central Visayas nga paspasan ang pag hire og mga magtutudlo. Kini aron nga ma accommodate ang panginahanglan sa mga magtutudlo karon nga nagpadayon na ang face-to-face classes sa kadaghanan nga mga eskwelahan sa rehiyon.
Sa uwahing datos nga gihatag sa DepEd7, naa sa kapin 2,000 o 68% sa 3,775 ka mga pampublikong tunghaan sa Central Visayas ang nagpahigayon na karon og face-to-face classes, samtang anaa sa 50 gikan sa 892 ka mga pribadong eskwelahan sa rehiyon ang nagpatuman na usab og in-person nga klase.
Padayun karon ang pagpangandam sa uban nga mga tunghaan aron nga sila makapahigayon na usab og face-to-face classes kini subay sa tinguha og mando sa DepEd sa pagpatuman sa full face-to-face classes sa tanang eskwelahan sugod sa buwan sa Nobyembre karong tuiga.
Gipasalig usab sa ahensya nga padayun silang nag tan-aw og nag monitor sa dagan sa pagpahigayon sa klase, ug andam ang tanan nilang mga personnel sa pag tubag sa mga problema ug uban pang panginahanglanon sa mga magtutudlo, eskwelahan, ug mga tinun-an.
“We really emphasize the safety of our teachers and our learners in going to and from schools, the DepEd7 has coordinated with the DOH as well as with our barangay officials and the police to ensure the health and safety of our students” pagpahinapos ni RD Jimenez. (RGC/PIA7 Cebu)
Comments
Post a Comment