Siquijor malipayon, mapasalamaton sa 'Bagong Pilipinas Serbisyo Fair'

 

LARENA, Siquijor (PIA) -- Malipayon ug mapasalamatong miabi-abi ang mga Siquijodnon sa pagbisita ni House Speaker Ferdinand Martin Romualdez kauban sa ubang mga kongresista ug uban pang mga opisyal sa gobyerno sa nasud.

Tumong sa pagbisita mao ang paghatud ug nga programa ug serbisyo ngadto sa mga Siquijodnon pinaagi sa Bagong Pilipinas Serbisyo Fair (BPSF) 2024 usa ka makahuloganong hitabo sa probinsya sa Siquijor nga gihimo niadtong Febrero 18-19 sa Siquijor State College (SSC).

Dako ang pasalamat ni Lone District Rep. Zaldy Villa, kinsa nagsilbing lokal nga host sa Bagong Pilipinas Serbisyo Fair (BPSF), samtang mipahayag nga gawas sa pagdala sa labing dako nga service caravan sa nasud ngadto sa Siquijor, ang probinsiya gipasigarbo usab nga nahimong unang recipient-province nga ang  halos tanang pamilya nakatagamtam sa mga kaayuhan ug serbisyo nga dala sa  kapin sa 200 ka mga programa gikan sa 39 ka ahensya. Matod niya nga sa unang higayon, kapin sa 300 milyones ka pesos ang nabahin sa mga Siquijodnon.

Si Gobernador Jake Vincent Villa usab, sa iyang mensahe atubangan sa mga benepisyaryo, mapasigarbohon nga ang nasudnong programa makasaysayanon alang sa Siquijor.

Mapasalamaton usab siya nga mipadayag  nga si Speaker Martin Romualdez ang unang speaker nga mibisita sa isla.

Si Romualdez midayeg sa pag-abli sa BPSF diin siya ang nagrepresentar ni Presidente Ferdinand Marcos ug sa House of Representatives — nga gitahasan sa pagpatuman sa caravan sa tibuok 17 ka rehiyon.

Gipasabot ni Romualdez nga ang Bagong Pilipinas Serbisyo Fair usa ka testamento sa katumanan sa mga saad ni Presidente Marcos.

Gidayeg ni Romualdez ang BPSF sa pagpakita sa gugma nga labaw sa mga pulong ug pagtubag sa mga panginahanglan sa katawhan alang sa kolektibong pag-uswag.

Ang Bagong Pilipinas Serbisyo Fair mao ang labing una labing dako nga consolidation program kon hiniusang programa, diin daghan nga mga ahensya sa gobyerno ang gidala sa probinsya sa Siquijor aron muhatag ug libreng serbisyo.

Usa niini ang Department of Health (DOH) diin mihatag sila ug libreng konsulta ug mga tambal.

Ang BPSF adunay kinatibuk-ang P300 milyon nga pondo nga gitagana alang sa labaw sa 50 mil ka mga Siquijodnons nga nakabenipisyo sa labaw sa  200 ka mga programa gikan sa 39 ka mga ahensya sa gobyerno nga nisalmot sa maong serbisyo fair.

Basi sa natala sa BPSF team, mikabat sa 54,401 ka beneficiaries ang narehistro ug nakatagamtam sa mga serbisyo ug hinabang niini. Samtang sa kinatibuk-ang pondo nga P300 milyon, P117 milyon cash mismo ang gipanghatag sa napiling mga benepesyaro diin kinadak-ang bahin sa pondo niini naggikan sa Department of Social Welfare and Development kon DSWD sa kantidad nga P80 miyon.

Kini gipanghatag pinaagi sa Assistance to Individuals in Crises Situation o (AICS), Tulong Panghanapbuhay sa Ating Disadvantaged/Displaced Workers o TUPAD ug uban pang programa ubos sa gobyerno. (CAG/PIA-Siquijor)