Kadiwa sa Bohol nakamugna og P1.1M nga kita

 

TAGBILARAN CITY, Bohol (PIA) -- Ang tulo ka adlaw nga Kadiwa ng Pangulo sa lalawigan sa Bohol nakamugna og kinatibuk-ang halin nga kapin sa P1.1 milyon gikan sa 108 ka exhibitors niini niadtong Marso 15-17.

Gitaho atol sa post-event meeting niadtong Marso 20 sa Kapitolyo ni supervising administrative officer sa Gobernador’s Office Metodio Maraguinot Jr., nga nikabat sa P1,171,419.70 ang kita sa tulo ka adlaw nga dagan sa KADIWA.

Ang maong agri ug trade fair nakadani og 13,598 ka pumapalit sumala sa taho sa Department of Trade and Industry (DTI), ang partner nga ahensya nga gitahasan sa pagkonsolida sa mga taho.

Ang unang edisyon sa Kadiwa ng Pangulo gipangunahan sa kagamhanang probinsyal sa pakigtambayayong sa DTI, Department of Agriculture (DA), Department of the Interior and Local Government (DILG), Department of Labor and Employment (DOLE), ug Department of Social Work and Development (DSWD).

Ang mga exhibitors mao ang mga micro small and medium enterprises (MSMEs) nga gi-abagan sa nasangpit nga mga ahensya.

Ang mga organizer nakiglambigit usab sa Bohol Association of Hotels Resorts and Restaurants (BAHRR), Bohol Chamber of Commerce and Industry (BCCI) ug sa Panglao Chamber of Commerce and Industry (PCCI) alang sa pagpares sa merkado.

Gipasiugda ni Provincial administrator Asteria Caberte nga ang agriculture and trade fair gituyo nga gisugdan ang pagpares nga mga kalihokan sa mga kauban sa institusyon aron masiguro nga makab-ot sa KADIWA ang tumong niini nga mas taas nga kita alang sa mga mag-uuma ug mga negosyante.

Ang KADIWA o Katuwang sa Diwa at Gawa para sa Masaganang Ani at Mataas na Kita ipasa ngadto sa mga local government units (LGUs) sa mosunod nga petsa 15 ug 30 sa kada buwan sugod sa Abril.

Si Gobernador Erico Aristotle Aumentado gitakdang mopagawas og memorandum aron awhagon ang mga LGU sa pagsalmot sa pagpahigayon sa Kadiwa.

Si Aumentado, atol sa pagbukas nga programa niadtong Marso 15, nihatag og gibug-aton nga kini nahisubay sa mga paningkamot sa provincial government, ubos sa iyang strategic change agenda, aron mapalig-on ang presyo sa pagkaon ug pagsiguro sa kaigoan o sufficiency sa pagkaon uban sa KADIWA isip dugang nga merkado.

Gipasiugdahan ni Presidente Ferdinand R. Marcos Jr., ang programa sa Kadiwa nagtumong sa paghatag sa mga konsumidor og akses sa barato ug dekalidad nga mga produkto, ilabina sa presko nga produkto, samtang nagtabang usab sa mga mag-uuma, mangingisda ug micro-enterprises sa pagbaligya sa ilang mga produkto sa patas nga presyo sa merkado. (ECB/PIA7-Bohol)