CEBU CITY, Cebu, January 15 (PIA) -- Ang Department of Social Welfare and Development (DSWD), pinaagi sa iyang Field Office-7 (Central Visayas), padayon nga nakig-alayon sa mga hingtungdang local government units (LGUs) sa rehiyon alang sa pag-monitor ug paghatag og tukmang interbensyon sa mga pamilyang apektado sa mga insidente sa baha ug uban pang mga emergency nga nahitabo sa katapusang quarter sa 2023.
Sa mga insidente sa pagbaha mahitungod sa localized thunderstorms nga nahitabo niadtong Septiyembre 2023 sa Compostela ug Danao City sa lalawigan sa Sugbo, ang DSWD Field Office-7 nihatag og kinatibuk-ang P223,462 nga kantidad sa humanitarian assistance ngadto sa mga apektadong pamilya.
Sa terminal report niadtong Enero 11 ngadto kang DSWD-Disaster Response and Management Group (DRMG) Undersecretary Diana Rose Cajipe, si DSWD-Field Office-7 Regional Director Shalaine Marie Lucero nagkanayon nga ang hinabang gipaabot ngadto sa 632 ka pamilya o 2,666 ka indibidwal nga apektado sa weather disturbance sa duha ka lungsod naglakip sa 231 ka family food packs ug 16 ka sets sa hygiene, sleeping ug family kits.
Gihisgotan usab sa DSWD regional director nga ang mga hingtungdan nga LGUs mitabang sa ilang kaugalingong mga konstituwente sa paghatag kanila sa mga pagkaon ug bugas, mga de lata, ug hinabang sa salapi niadtong kansang mga balay hingpit ug partially naguba sa mga insidente sa pagbaha.
Si Director Lucero miingon nga ang DSWD Field Office mihatag sa tabang subay sa hangyo sa duha ka LGUs alang sa resource augmentation aron masiguro nga ang mga apektadong pamilya makabalik dayon sa ilang normal nga kinabuhi.
“Samtang gi-terminate na namo ang among disaster report alang sa mga insidente sa pagbaha sa Compostela ug Danao City, nagpadayon kami sa koordinasyon sa duha ka LGUs aron masiguro nga ang mga apektadong pamilya anaa na sa normal nga kinabuhi. (While we have terminated our disaster report for the flooding incidents in Compostela and Danao City, we continue to coordinate with the two LGUs to ensure that the affected families are already leading normal lives),” matod ni Lucero sa iyang report.
Sa susamang kalambuan, si Lucero nitaho nga ang DSWD7 nihatag usab og augmentation support sa LGU sa dakbayan sa Naga sa lalawigan sa Sugbo aron makatabang sa panginahanglanon sa pagkaon sa mga pamilyang apektado sa nahitabong tension cracks sa lugar.
Ang tension cracks naobserbahan nga mitumaw niadtong Septiyembre 2023 sa Purok 1, Riverside, Barangay Cantao-an uban sa padayong konstruksyon sa Metro Cebu Expressway.
Mokabat sa 2,121 ka pamilya o 7,716 ka indibidwal ang apektado sa nahitabong tension cracks. Sa maong ihap, 61 ka pamilya o 232 ka indibidwal ang nagpabilin sa mga evacuation center nga gipahimutang sa LGU.
“Niadtong Enero 11, naka-deliver mi og 2,005 ka family food packs nga mokabat sa kapin sa P1.19 milyones ngadto sa LGU sa siyudad. Ang mga food packs ipanghatag sa mga apektadong pamilya sa Miyerkules, Enero 17. (On January 11, we have delivered 2,005 family food packs amounting to more than P1.19 million to the city LGU. The food packs will be distributed to the affected families on Wednesday, January 17.),” matod ni Lucero.
Sa sayo pa, niadtong Disyembre 13, 2023, ang DSWD7 unang nanghatag ug 52 ka family food packs sa LGU sa siyudad.
"Kami kanunay nga nakig-alayon sa City Social Welfare and Development Office (CSWDO) alang sa bisan unsang mga update ug alang sa uban pang mga interbensyon nga gikinahanglan sa mga apektadong pamilya (We are constantly coordinating with the City Social Welfare and Development Office for any updates and for other interventions needed by the affected families)," matod ni Lucero. (JAT/PIA 7)
Comments
Post a Comment