TAGBILARAN CITY, Bohol, January 9 (PIA) -- Tulo ka gatus ug napulo ug tulo ka porsyento ang pag-busdik sa kadaghanon sa turist nga ming-abut sa Bohol sa 2023, kon itandi sa 2021.
Kini maoy unod sa gitaho ni Gobernador Erico Aristotle Aumentado didto sa Capitol Reports sa mi-aging semana, subay usab sa kasayturan nga nahakot sa Bohol Provincial Tourism Office (BPTO).
Gitaho sa gobernador nga, bisan kon wala pa malakip ang natigum nga kasayuran gikan mismo sa mga resorts, hotels ug resorts sa Panglao, miabut na sa 742,990 ka turista ang miabut sa Bohol sa 2023.
Sa datus nga gibase usab sa BPTO, sa kapin sa 700 mil ka mga turista, 511,997 niini ang mga turista nga Pinoy samtang 230,990 ang turista nga langyaw.
Kahinumduman usab nga sa tuig sa wala pa isira ang turismo sa Bohol niadtong 2018, natala ang kapin sa 1.2 ka milyon ka mga turista ang nahidangat dinhi sumala sa natala nga tourism arrivals nga nalista sa mga hotels, resorts, pension houses ug overnight accommodations sa Bohol.
Sa 2020, gikataho nga miabut na sa 177,431 ang mga turista nga misulod sa Bohol dihang hinayhinay nga gibuksan ang mga ganghaan sa lalawigan alang sa turismo, bisan pa sa nagpadayon nga hulga sa pandemya.
Pagkasunod tuig, nalapasan ug miabut sa 179,781 ka mga turista ang misuroy sa Bohol, atul usab sa ngakanindot nga mga tanyag sa mga tourism stakeholders aron pag-paikag sa mga manuroyay dinhi.
Sa 2022, diha nga hingpit na nga gideklara ang pandemya sa COVID nga buntog na tungod sa nagkalapad nga katawhang bakunado batok niini, kalit nga mingsulbong ang kadaghanon sa mga turista nga natala nga mang-abut sa 535,803 o hapoit 300% ka pilo sa kadaghanon sa miagi nga tuig.
Sa 2023, ug gani taman sa Enero 2, 2024, matud sa BPTO nga napun-an pa ug ming-abut sa 742,990 ang namatikdan nga tourism arrivals sa Bohol.
Bisan pa usab niining tanan, sayud ang mga taga BPTO nga kasagaran nga mga hotels, resorts ug accommodation facilities, nagmakuli sa pagtaho sa kadaghanon sa ilang mga overnight guests sa kahadlok nga kini nga kadaghanon gamiton sa kagamhanan sa pagkwenta sa buhisan.
Dugang pa usab, ang World Tourism Organization nga maoy naghatag sa giya sa pag-ihap sa mga tourism arrivals sa usa ka lugar, mikonsiderar lamang sa mga turista nga mohigda ug mopalabay sa labing menos usa ka gabii sa usa ka lugar ang malakip sa tourism arrivals.
Niini nga kasayuran, mahimo nga kon masulod ang taho sa Panglao, nga maoy labing gibisita nga lugar sa Bohol, mahimong mas taas pa kini kay sa nataho na. (RAHC/PIA7 Bohol)
Comments
Post a Comment