TAGBILARAN CITY, Bohol, January 8 (PIA) -- Duha na ka dagkong bangka nga fiberglass reinforced plastic (FRP) nga panagatan ang ming-abut sa Bohol dala sa saad 10 ka bangka nga ihatag sa Bureau of Fisheries and Aquatic Resources (BFAR).
Kini human nasubay na sa mga tinugyanan ang ikaduha nga bangka nga mingdunggo sa Sitio Daurong sa Panglao, saysay ni Salvio Madanguit, coordinator sa Fish Buy-Back Program sa Bohol.
Ang pagpasulod sa mga bangka, maoy lakang nga tampo sa BFAR ngadto sa Bohol nga sa pagka-karon, naningkamot pa gihapon nga kahatagan og solusyon ang mahal nga presyo sa isda dinhi.
Segun sa mga nagtuon ug subay sa taho sa Bohol Baratong Isda Task Force, may daku nga kakuwangon sa isda sa Bohol, bisan pa man nga ang lalawigan gilibutan sa mga dagat.
Nasayran nga daghang mananagat ang napaundang sa pagpanagat tungod sa pagpangaguba sa ilang mga kahimanan sa panagat sama sa sakayan, mga pokot ug mga payaw human naagi-an sa super typhoon nga Odette.
Sa kalisud sa paghalin usab sa isda nga kuha sa pipila nga nanagat, kasagaran niini, adto na ibaligya sa mga komprador nga mosugat sa lawod, bisan kon kini paliton og barato, kay hutdon man ug kompra. Kini nga kinompra, adto itumod sa mga kamerkadohan sa Sugbo.
Dyutay lamang usab ang dagkong panagatan sa Bohol, kasagaran niining nanagat, mga gagmay nga mananagat nga nanagat pangunsumo lamang og talagsa rang mamaligya, hinungdan nga kuwang gayud sa supply nga mahidangat sa kamerkadohan.
Nangita kita sa long term ug short term solution sa atong suliran, ug subay niini, atong giorganisa ang mga mananagat aron mas dali silang tabangan sa kagamhanan, matud ni Madanguit.
Si Gobernador Erico Aristotle Aumentado mismo ang minghangyo sa BFAR aron mahatagan ang mga nahugpong nga mangingisda sa Bohol sa commercial fishing boat, nga gidesinyo alang sa handline o net fishing, sugid ni Madanguit kinsa mituo nga ang pagdaghan sa supply sa isda, makapaubos sa presyo niini sa kamerkadohan.
Sa suliran sa kakuwang sa dagkong panagatan, ang mga naorganisa nga mananagat, makadawat sila sa mga moderno nga bangka panagatan, aron dili lamang sa municipal waters managat kon dili didto na sa lawod.
Subay sa balaod, ang unang 15 kilometros nga kadagatan gikan sa baybay, isipon nga municipal waters nga panagatan sa mga gagmay nga mangingisda.
Kon molapas na sa 15 kilometros, kini bukas na nga panagatan sa mga commercial nga bangka, diin dinhi usab sarang igkita ang mga commercial nga matang sa isda.
Niini, ang BFAR misaad nga mohatag sa Bohol og 10 ka 38 footer nga FRP nga dagkong bangka, nga lakipan usab sa 6 ka mga gagmay nga bangka o gitawag og pakura sa Japan.
Ang matag bangka nga panagatan, may kaugalingon nga fish finder, sonar ug cargo hold nga kasudlan sa gibutangag ice nga isda, dugang ni Madanguit.
Kini usab kuygan sa upat ngadto sa unom ka mga baroto nga magkinaugalingon og panagat samtang naglagak usab sa dinagkong pokot ang dakong bangka.
Ang tanan nga kuha niini, dalhon ngadto sa daku nga bangka, aron matipigan og sakto ug dili madubok samtang dili pa ikatumod.
Dugang ni Madanguit nga ang una nga dakung bangka, nadawat na sa Guindulman samtang ang ikaduha, alang sa Panglao.
Didto usab sa Guindulman trabahoon ang mga baroto nga fiberglass nga magkuyog sa dagkong bangka.
Ang mga bangka, gikan mismo sa Subic, ug gilawig paingon sa Bohol.
Sa sunod nga mga buwan, mag-anam-anam og abut ang walo pa sa 10 ka bangka nga gisaad sa BFAR, segun pa sa tinubdan sa BFAR. (RAHC/PIA-7 Bohol)
Comments
Post a Comment