SSS: 'Dugang SSS pension lisud pa nga himoon'

 

TAGBILARAN CITY, Bohol, Dec. 6 (PIA) -- Tun-an og maayo sa Social Security System (SSS) ang unang gisugyot nga dugangan og usa ka libo ang pension nga gihatag niini sa mga retiradong sakop niini.

Kini maoy gipadayag ni SSS Chief Executive Officer (CEO) ug President Rolando Ledesma Macasaet, atul sa gihimong Stakeholders Forum nga gitambungan sa mga representante sa mga sakop sa labor sector, ug management sector, didto sa Be Grand Hotel sa Panglao, Disyembre 6.

Kini sanglit, ang pagdugang sa P1 o P2 ka libo sa pension sa tanang sakop, kon dili kini kuygan og kasaligan nga pagpundo, maoy labing dali nga paagi nga magpatilok sa pundo sa pension.

Gipasabut ni Macasaet, kinsa nahimo usab kanhi nga presidente sa Government Service Insurance System (GSIS) nga adunay kapin kon kulang 3.5 milyones ka mga sakop niini.

Sa kasamtangan, P3.5 bilyones matag buwan ang kinatibuk-an sa 3.5 milyones ka mga tawo nga gihatagag pension sa SSS.

Kon pun-an pa og usa ka libo, moabut na sa 7 bilyones matag buwan ang magamit sa pundo nga natigum sa SSS, matud ni Macasaet.

Sa laing bahin, ang SSS nga nagkobra sa binuwan ug matag kwarter nga kontribusyon sa mga sakop, makahipos lamang og kapin kon kulang 226.1 bilyones sa 2021.

Sasusamang tuig, sa pagpanghatag og tag P1 libo apilan pa sa  mga benepisyo nga angayan madawat sa mag sakop subay sa polisiya nga gihuptan, nakahatag ang SSS og 223.98 bilyones.

Kini nagpasabut nga sa 2021 lamang gani, P2 bilyones ra ang tataw nga tigum sa SSS sa matag tuig.

Niini, kon manghatag pa ang SSS og dugang usa ka libo, magkinahanglan kini og P7B matag buwan, o P84 bilyones, alang lamang sa pension, wala pay kwenta ang mga benepisyo sama sa maternity, sick benefits, funeral, loans ug uban pang serbisyo.

Gipasalig usab sa SSS nga wala unay ipatuman nga pagtaas sa kontribusyon sa 2024, mao nga wala gyud pay klaron nga kakuhaan sa pundo kon pun-an man ugaling ang pension.

Dili kini sayon nga desisyon, dayag ni Macasaet atubangan sa mga sakop sa SSS nga didto nagkatpok sa Be Grand Convention Center.

Ang usa ka organisasyon nga walay tataw nga tinubdan sa kita, dili makapadalidali og gamit sap undo niini, dugang niya.

Gitudlo kami aron padayonon ang serbisyo sa SSS ug ipatunhay ang kinabuhi sa pundo aron magpabilin nga magdawat ang mga pensioners ug ang ilang mga kaliwatan, panapos ni Macasaet. (RAHC/PIA Bohol)