PMP Bohol: 80% sa heavy equipment giseguro magamit kanunay

 

TAGBILARAN CITY, Bohol, Nov. 13 (PIA) -- Sa tanang higayon, 80% sa mga heavy equipment sa Kapitolyo ang anaa sa running condition ug magamit sa mga gikinahanglang buluhaton sa Provincial Engineers Office (PEO) ilabi na sa gikinahanglan nga pagmintinar sa mga provincial, ug pag-abag sa pagmintinar sa municipal ug barangay roads.

Kini maoy gitaho ni Engr. Abraham Clarin, hepe sa Provincial Motor Pool (PMP), ang buhatan nga natahasan sa pagmintinar usab sa mga sakyanan ug heavy equipment sa Kapitolyo nga gikinahanglan sa PEO sa ilang mga maintenance activities.

Ilawom sa Capitolyo ug ubos sa pagmintinar sa PMP mao ang 81 ka mga heavy quipment ug pipila ka service vehicles nga mga karaang na ug gipanag-iya sa Kapitolyo nga gikan sa mga departamento niini apan gipang-uli na sa ka daan na.

Ang PEO usab, gitahasan sa pagmintinar sa kapin kon kulang 850 kilometros sa provincial roads, 520 kilometros sa anapogon nga dalan ug lain pa nga 4,500 kilometros nga kadalanan nga municipal ug barangay, sumala sa Provincial Planning and Development Office.   

Ug sa mga ekipo nga gimintinar ug gipaningkamotan sa mga mekaniko sa PMP nga makadagan aron makatabang sa mga trabahoon, 32 ka units niini, sobra na sa 2 ka tuig ang edad ug nakaubos na ang economic value niini.

Ang 81 ka units mao ang 4 ka bulldozers nga dili parehas ka daanon, 8 ka backhoe, 4 ka payloader, 25 ka dump trucks, 14 ka road graders, 13 ka pison, 1 ka prime mover, us aka tangke sa tubig ug lain pa nga 1 ka tangke alang sa gasolina.

Sa  dump trucks, sa 25 nga kasamtangan nga dump trucks, and siyam niini napalit niadto pa nga 1999,  samtang sa 14 ka road graders, 2 niini ang sa kakaraan, wala nay mapalit nga pisa, apan pinaagi sa kamaayo sa mga mekaniko sa kapitolyo, nagdagan pa gihapon samtang nanguha og pisa sa uban nga ekipo nga wala na usab magdagan.

Sa 13 ka mga pison, taho ni Clarin nga adunay duha niini nga wala na nagdagan tungod kay wala nay pisa nga mapalit, apan milaum pa ihapon ang kagamhanan nga makakuha og medyos nga magamit pa gihapon ang mga nahisgutan nga mga ekipo.

Segun sa Bureau of Local Government and Finance, ang kasagaran nga edad sa mga ekipo nga gigamit sa kagamhanan, anaa lamang sa 10 ka tuig.

Kon molapas na niini, kasagaran, mas daku na ang gikinahanglan nga maintenance niini nga mas makadaginot pa ang pagpalit og bag-o kay sa agwantahon ang karaang nga ekipo.

Luyo niining tanan, sa pangutana nga morekomendar ba ang PMP sa pagpabag-o sa mga ekipos karon, mas gipaboran pa ang pagpamalit og service vehicles puli sa mga karaan nga sakyanan nga gipugos karon og pagpadagan.

Matud usab ni Engr. Camilo Gasatan, nga may higayon na nga may service vehicle sa Kapitolyo nga natangtangan og ligid, samtang nagdagan sa kadaan na sa sakyanan, nga mas delikado na sa mga empleyado ug opisyal sa Kapitolyo nga mogamit niini. (RAHC/PIA7 Bohol)