BPO: Pagpanalipod sa babayeng gidagmalan

 

TAGBILARAN CITY, Bohol, Dec. 1 (PIA) -- Mahimo nga makakuha ang usa  ka babaye nga gidapatan sa iyang kauban sa balay sa Barangay Protection Order (BPO), aron mapa-undang na ang pagpanamastamas ug kapintas nga iyang nasinati.

Kini maoy gibutyag sa mismo hepe sa Women and Childrens’ Protection Desk (WCPD) sa Bohol Provincial Police Office, atul sa senemana nga Kapihan sa PIA nga mabati sa DyTR matag Biyernes alas 4:00-5:00 sa hapon.

Didto sa radio interview nga gisibya sa PIA Bohol Facebook ug Youtube channel, gibutyag ni Police Captain Mildred Taga-amo nga mahimo ang usa  ka babaye nga gidapatan ug nakasinatig kapintas sa panimalay o sa iyang mga kaila, nga mokuha og BPO.

Tumong niini nga manduan sa barangay captain ang nagbuhat sa kapintas ug salaod sa pagpanagmal ug psychological nga abuso nga mapalayo sa biktima sulod sa 15 ka adlaw, o mahimo siya’ng ipadakop sa barangay.

Atul sa radio forum nga nagtuki sa mga kalihukan ug hisgutanan sa 18-Day Campaign to End Violence Against Women, nga maoy topic sa Kapihan sa PIA, gilakbitan usab sa babayeng opisyal sa kapolisan nga ang BPO, mahimong makuha gikan sa Barangay Captain o sa First Kagawad, kon wala ang Kapitan.

Ang BPO magmandu sa nanamastamas ug nanapat sa dili pagpakita sa iyang biktima sulod sa 15 ka adlaw, aron usab dili na magpadayon pa ang pagpanagmal.

Sa mga kaso sa bana ug asawa, ang BPO magpugos sa bana sa paglikay una sa pagpakigkita sa iyang asawa sulod sa 15 ka adlaw, aron makahunahuna kini ug magpugong na sa iyang gibati nga kasuko nga makapasakit na sa laing tawo.

Gawas sa BPO, makasumbong usab ang biktima sa Women and Children’s Desk sa Barangay, aron makahatag og giya ang mga opisyales sa angay buhaton.

Matud ni Taga-amo, obligado ang barangay nga mo-abi-abi ug mopahiluna sa biktima sa angayan niining pagkabutang, ilabi na kon ang nagpasipala, kauban sa balay ug dili pa madakop sa kapolisan.

Ang barangay usab maoy mopahiluna aron madala ang kaso ngadto sa estasyon sa kapolisan ug makuhaag saysay ang biktima alang sa pagduso unya sa kaso, kon dili mahilot sa barangay.

Gipadayag usab sa opisyal, nga sa nagkadaghan nga kababayen-an nga nasayud na sa angay buhaton, nagkadaghan usab ang nanggawas nga mga kaso, nga giabi-abi sa kapolisan.

Gani, gikan sa September 1, 2023 ngadto sa Oktubre 31 pananglitan, 12 ka kaso sa kapintasan ang nakaabut sa mga kapolisan, 8 niini ang napasakaan sa kaso apab may 4 pa nga nagdumili sa pagpasaka sa kaso sa nagkadaiyang rason.

Sa pagpanglugos, unom ka kaso ang nasumbong sa kapolisan ug lima na niini ang naduso na sa korte, samtang sa kaso sa pagpanghikap ug pagpanghinol sa mga mga pribadong bahin sa lawas sa babaye, 4 na ka kaso ang nafile gikan sa 4 usab ka sumbong, taho ni Tagaamo.

Sa susamang panahon, 22 ka kaso sa kapintas batok sa kababayen-an ang nataho ug 17 na niini ang naduso na ang mga kaso ug nadakpan na ang mga nagbuhat sa salaud. (RAHC/PIA7 Bohol)