TAGBILARAN CITY, Bohol, Dec. 4 (PIA) -- Kon maguman na og tupok ang tanan, abton sa 57, 640 ka mga iro sa Bohol ang mabakunahan ug mahimong luwas sa rabies, hangtud sa sunod tuig.
Kini kay nakapagawas na ang Office of the Provincial Veterinarian (OPV), kinsa nga buhatan maoy nangabaga sa Programa sa pagpugong sa rabies, sa 5,764 ka vials sa bakuna alang sa mga iro.
Kini matud pa ni Dr. Nida Daguro, dog vaccine coordinator sa OPV, ug gani, sa pagpaningkamot nga mapasutoy ang kampanya, duha na lamang ka lungsod sa Bohol ang wala pa makakuha sa ilang mga bakuna.
Ang matag vial sa bakuna, may igo nga ikatupok sa napulo ka iro, u gang mga bag-ong napagawas nga bakuna, maka-sarang na alang sa paghatag og panalipod sa mga kapin kon kulang 57,000 ka mga iro.
Apan, sa labing bag-ong ihap nga nakuha human nahimo ang katapusang magpangrehistro ug pagpamakuna sa mga iro, gibanabana nga moabut na sa 200,000 ang populasyon sa mga iro: hinuktan, amo naa sa tangkaw, ug layaw.
Gipadayag usab ni Provincial Veterinarian Dr. Stella Marie Lapiz nga gawas sa kapin sa 5 mil ka vials sa bakuna, may mga bakuna na sa miaging tuig nga wala magamit nga giuna og panghatag sa mga kalungsuran nga una nang nakasugod og pamakuna sa wala pa makagawas ang vaccine allocation sa 2023.
Kini nagpasabut nga mahimo nga mas daghan pa ang maabut sa bakuna bisan pa sa naghinapos na nga tuig.
Ang pamakuna sa mga iro, maoy usa sa mga solusyon nga pakalmahon ang hulga sa rabies dinhi sa Bohol.
Matud ni Lapiz, tumong sa Bohol nga maabut sa bakuna ang 70% sa kinatibuk-ang populasyon sa mga iro, aron makab-ot ang herd immunity.
Kon makab-ot sa Bohol ang herd immunity, bisan kon dili tanan nga iro ang mabakunahan, giulantaw nga mohinay ang kaso sa rabies.
Sa taho ni Dr. Cesar Tomas Lopez, medical health services division chief sa Provincial Health Office, gikan sa Enero ngadto sa Nobyembre 2023, mikabat na sa 7,268 ang kaso sa mga tawo nga biktima sa pagpamaak sa mga iro.
Gani, dugang niya, miabut na sa 12 ka tawo ang namatay tungod lamang sa kaso sa rabies nga nakuha gikan sa pinaakan sa iro.
Dinhi sa Bohol, una na nga gilunsad ang Bohol Rabies Prevention and Elimination Program, ug nakuha na sa Bohol ang kanhi zero rabies cases in humans.
Apan, human sa pila ka tuig ug napun-an pa sa pag-undang sa libreng bakuna gikan sa nasudnong kagamhanan, sa pagdagsang sa COVID, pila ka tuig usab nga naundang ang pamakuna, hinungdan nga mingsi-aw na usab ang sakit.
Matud ni Gob Erico Aristotle Aumentado, dili mahimong magsagol ang turismo ug ang public health concern sa rabies.
Nunot niini, iya usab nga gipanawagan ang mga nagbuhi og iro nga mahimong responsible sa ilang mga binuhi aron dili makaperhisyo sa uban.
Gawas nga daghan na ang namatay tungod sa rabies sa iro, mas daghan pa ang namatay sa disgrasya nga ang hinungdan, ang iro nga gipasagdan sa kadalanan. (RAHC/PIA Bohol)
Comments
Post a Comment