TAGBILARAN CITY, Bohol, Nov. 5 (PIA) -- Anaa na sa 59% ang mga tinugyanan sa Philippine Drug Enforcement Agency (PDEA) ug mga kaalyado niini ang accomplishment sa Barangay Drug Clearing Program dinhi sa Bohol.
Nalakip na niini ang una nga 17 ka mga barangay nga drug free na usab.
Kini maoy nakuha, gikan sa taho nga gipaamit ni PDEA Intelligence Officer Ferdenand Kintanar, didto sa hiniusang tigum sa Provincial Peace and Order Council (PPOC) ug sa Provincial Anti Drug Abuse Council (PADAC) sa miaging semana.
Gitaho ni Agent Kintanar nga sa 1,109 ka mga barangays sa Bohol, 17 niini ang gi-isip sa mga tinugyanan nga drug-free sukad masukad.
Niiing bag-o lamang, gipagawas usab sa PDEA Bohol nga may 643 na ka barangay sa Bohol ang nakuhaan na sa suliran sa illegal nga drugas, kay na drug cleared na kini, dugang ni Kintanar.
Niini, lain nga 449 na lamang ka barangay sa Bohol ang gikanahanglan pa nga ipalingkawas sa hulga sa illegal nga drugas.
Sa iyang taho sa PADAC, aron mas mopapas pa ang pagpalingkawas sa mga barangay, usa ka Training of Trainors kabahin sa Community-based Anti-Illegal Drugs Advocacy ang gitanyag sa PDEA ngadto sa matag LGU aron makapadala sila og representante sa pagbansay.
Dugang pa, sa assessment sa PDEA, ang kahimtang sa kahapsay ug kalinaw sa Bohol diha nga naapektohan sa illegal nga drugas, mas mimaayo karon, kon itandi sa miaging mga katuigan, taho ni Kintanar.
Dugang niya, ang gipalig-on nga mga stratehiya sa kagamhanan sa pagtubag sa pagdaghan sa illegal nga drugas nga nalangkob sa pagpapiit sa supply ug sa pagpahinay sa panginahanglan, kini maoy mingresulta na sa nagkanihit nga suliran sa illegal nga drugas. (RAHC/PIA7 Bohol)
Comments
Post a Comment