TAGBILARAN CITY, Bohol, Nov. 20 (PIA) -- Gipahimangnoan sa Department of Health (DOH) ang publiko bahin sa mga malimbungon nga social media account nga nagpakaaron-ingnon nga opisyal nga COVID-19 vaccination registry website.
Matud pa sa gipagawas nga pahayag sa DOH, ang mga peke nga account nangayo og salapi bugti sa pagparehistro sa VaxCertPH, ang opisyal nga digital vaccination certificate sa Pilipinas.
Ang DOH kusganong nagpahinumdom sa publiko nga ang VaxCertPH nagpabiling libre.
Gitambagan usab sa DOH ang mga Filipino nga magmabinantayon kung makig-interact sa mga account nga susama o nagpakaaron-ingnon nga opisyal sa gobyerno o opisyal sa panglawas.
Gitambagan usab sa DOH ang publiko nga mokuha lang og impormasyon gikan sa mga kasaligang tinubdan ug opisyal nga social platform sa departamento.
Niadtong Martes, Nobyembre 14, ang DOH nakadawat og mga taho nga ang COVID-19 vaccination data gikan sa Pilipinas ngadto sa World Health Organization (WHO) nakompromiso.
Tungod niini, namahayag si DOH Kalihim Teodoro Herbosa nga naghimo ang ahensya og dugang nga mga lakang aron mapauswag ang seguridad sa mga sistema sa datos niini. (ECB/PIA7-Bohol)
Comments
Post a Comment