98% nga nagpa-prenatal care sa 2008, 87% na lang sa 2022 NDHS

 

TAGBILARAN CITY, Bohol, Nov. 6 (PIA) -- Ming-ubos ang kadaghanon sa mga nagsabak nga mingbisita sa mga Rural Health Centers (RHC) alang sa ante-natal care  o pre-natal care gikan sa 98% niadtong 2013 ngadto na  sa 87% sa 2022.

Kini maoy napagawas nga resulta sa National Demographic and Health survey (NDHS) nga gipadagan sa Philippine Statistics Authority (PSA sa 2022.

Ang pagbisita sa RHCs magseguro nga makakuha ang usa  ka babaye nga buros sa saktong pag-atiman sa iyang gisabak nga bata, hangtud nga kini luwas nga ihimugso.

Segun sa taho sa PSA kabahin sa NDHS nga gipadayag niadtong Oktubre 31 didto sa JJs Seafoods Village, 88% pa usab ang kadaghanon sa  mga babaye nga misubay sa mga RHCs alang sa ilang prenatal services niadtong 2013.

Si PSA Bohol chief Jessamyne Anne Alcazaren  mibutyag usab nga subay sa survey, sa 1998, o lima ka tuig human niadto, mikalit og sulbong ngadto sa 93% ang mga nagsabak nga mipailawom sa prenatal services.

Mikunhod man kini sa 91% sa 2003 subay sa  napagawas sa NDHS niadtong tuiga, misaka na usab kini sa 97%  sa 2008 NDHS.

Sa 2013, miabut pa gani sa 98% ang kadaghanon sa mga babayeng buros nga nagpapre-natal subay sa NDHS data niadtong tuiga.

Sa 2017, napakita usba nga ning-us-os ang kadaghanon sa nagpa prenatal ngadto sa 96%, ug sa 2022 nga survey, naa naa kini sa 87%.

Hinuon, napakita usab nga sa mga buros nga nagpa-prenatal, kasagaran na kanila nakatanda sa skilled professionals alang sa ilang binuwan nga prenatal care and services sa labing menos 4 sa siyam ka buwan.

Nagkadaghan na usab ang mga nanganak nga anaa na sa sulod sa health facility aron maseguro ang luwas ga pagpahimugso sa bata.

GIkan sa 27% lamang sa mga nanganak ang didto  sa mga health facilities sama sa health ug birthing centers niadong 1993, anaa na sa 95% sa 2022, segun sa NDHS data.

Sa laing bahin, gikan sa 73% sa mga pagpanganak nga didto lamang sa mga balay ug gitambongan sa mga mananabang ug manghihilot niadtong 1993, karon, 5% na lang ang mga nanganak ang didto sa ilang mga balay.

Gilagda na karon sa kagamhanan nga dili na mahimo nga adto manganak sa balay kay bukas ug kanunay nga may skilled professionals nga naa sa mga rural health unit facilities.

Gani,  sa Central Visayas, 9 sa matag 10 ka pagpahimugso, kini gitutokan sa skilled health provider.

Napakita usab nga ang kakuwang sa kwarta nga ikabayad sa pagpanganak ug pagpahiling alang sa prenatal services ang kasagarang gitumbok nga rason nganong dili moadto sa RHCs.

Ikaduha na niini ang dili moadto kon walay kauban nga ikakuyog ug  ang kalayoon sa RHC nga ikatulong rason. (RAHC/PIA Bohol)