TAGBILARAN CITY, Bohol, Nov. 5 (PIA) -- Napulo ug upat pa lamang sa 48 ka lungsod ug syudad sa Bohol ang nakatuman sa gimandu ni Gobernador Erico Aristotle Aumentado nga mugnaon ug himoong aktibo ang Municipal Task Force on Ending Local Communist Armed Conflicts (MTF ELCAC).
Kini maoy gitaho ni Provincial Task Force ELCAC coordinator Romeo Teruel didto sa hiniusang tigum sa Provincial Peace and Order Council ug Anti-Drug Abuse Council nga gitambungan usab sa mga mayor Oktubre 18.
Kahinumduman nga gimandu ni Gob Aumentado ngadto sa mga mayor ang paghulma ug pagpalig-on sa MTF ELCAC, aron mas mapasayon ang mga paningkamot nga kahinginlan na ang duguong pakigbisug ilabi na kay bukas na ang local nga kagamhanan sa hisgutay sa kalinaw.
Apan, butyag ni Teruel, hangtud karon, ang 14 nga mingtuman sa mandu sa gobernador mao lamang ang Antequera, San Isidro, Ubay, Sagbayan, Catigbian, Tubigon, Calape, Mabini, Duero, Anda, Valencia, Guindulman, Alicia ug Pilar.
Niini, bukas nga minghangyo ang PTF ELCAC ngadto s amga mayor sa kalungsuran nga wala pa makamugna sa ilang MTF ELCAC sa paghimo na niini, ilabi na sa mga kaugmaran kabahin sa nagkadaghan nga ihap sa mga kanhi rebelde nga mingtahan na ngadto sa kagamhanan.
Dugang pa ni Teruel, sa dugang tinguha nga mapahiluna ang pagtahan sa mga kanhi sakop sa kalihukang walhon aron mahibalik sa sabakan sa balaod, gipahigayun sa PTF ELCAC uban sa Kapitolyo ang 3 ka adlaw nga bansaybansay sa 40 ka CAFGU Active Auxiliary ug pipila ka regular nga sakop sa Philippine Army uban sa mga community organizers sa Kapitolyo.
Ang bansaybansay kalabut sa Community Organizing ug Community Development gihimo didto sa Panda Tea Suites Oktubre 9-11, 2023.
Ang kalihukan, usa ka pagpalig-on sa atong partnership uban sa militar sa atong pagpaningkamoy nga makab-ot na ang kalinaw ug kahusay aron mapa-undang na ang local nga panagbangi, saysay ni Teruel.
Kay ang mga CAA anaa man naka assign sa conflict affected barangays ug Geographically Isolated ug Depressed areas, kini maggahum kanila sa katakus sa paghulma sa mga kooperatiba ug pagugmad niini aron mas mahimo pa nila nga maayo ang ilang nag-unang tuyo sa pagmintinar sa kalinaw ug kahusay sa ilang mga lugar diin sila na-assign.
Kini aron makatabang usab sila nga mamahimong dili na ikasalikway nga sakop sa komunidad ug kaabag sa mga residente sa ilang socio-economic development, dugang ni Teruel. (RAHC/PIA Bohol)
Comments
Post a Comment