TAGBILARAN CITY, Bohol, October 21 (PIA) -- Kapin sa usa ka libo ka libre nga slots alang sa Competency Assessment and Certification for Workers (CAC-W) alang sa mga nagtrabaho na ug Overseas Filipino Workers (OFWs) ang gipakayab sa kagamhanan, ug mamahimo nga makuha taman sa Disyembre 2023.
Kini maoy maayong balita nga gipaambit sa Technical Education and Skills Development Authority (TESDA) Bohol pinaagi nila ni supervising Tech Educ and Skills Dev Specialist Joan Sayon ug Rasell Pagaran, didto sa labing bag-o nga Kapihan sa PIA program.
Gipasabut sa TESDA nga ang libre nga assessment slots karon, alang lamang sa mga nakatrabaho na nga wala pa makakuha sa ilang assessment ug wala pay dokumento nga gihuptan nga makapamatuod nga aduna na silay katakus nga haum sa mga katakus nga gihuptan sa mga mingtapos sa bansaybansay sa technical vocational ug educational training.
Hinuon, matud ni Sayon, mahimo usab nga makakuha kadtong monghuman sa scholarship training ug wala makapasar sa una nga assessment apan nakatrabaho na ug karon, manginahanglan na sa ilang certification.
Ang TESDA National Certification usa ka pagmatud nga ang naghupot niini, may katakus nga katumbas na sa mga katakus sa mga hingtapos sa bansaybansay subay sa nasudnong kwalipekasyon nga gipamatuod pinaagi sa TESDA.
Ang mga makalibre sa CAC-W kadtong buot magpa-assess nga nagtrabaho na sa Barangay Health Services NC II, Bartending NC II, Book Keeping NC III, Bread and Pastry Production NC II, Caregiving NC II, Carpentry NC II, Computer Systems Servicing NC II, Cookery NC III, Driving NC II, Electrical Installation and Maintenance NC II, Events Management Services NC III.
Food and Beverage Services NC II Health Care Services NC II, HouseKeeping NI II, Masonry NC II, Motorcycle Small Engine Servicing NC II, Organic Agriculture Production NC II, Refrigeration and Air Conditioning (Domestic RAC) NC II, Shielded Metal Arc Welding NC II, Tourism Promotion Services NC II ug Visual Graphic Design NC III, saysay ni Pagaran, didto sa Kapihan sa PIA.
Alang niadtong interesado sa libre nga 1,025 ka slots nga bakante pa, giaghat ang mga nagplano nga moagi sa assessment nga moadto sa TESDA Bohol Provincial Office kilid sa City Hall sa Tagbilaran, magdala og 3 ka piraso nga passport sized picture nga ang sul-ob, may collar ug gikuha sa puti nga background, Certificate of Employment gikan sa amo sa gitrabaho-an o gikan sa Kapitan sa Barangay kon self employed.
Didto sa TESDA Bohol, gihinahanglan usab nga mokuha sa Application Form ug mo fill-up niini, aron mapahiluna sa TESDA kon diin nga technical vocational assessment center iduso alang sa libre nga assessment.
Aduna usba self-assessment guide nga pwede nga i-download gikan sa www.tesda.gov.ph aron dili na mahikuratan sa paghimo sa assessment. (RAHC/PIA-7 Bohol)
Comments
Post a Comment