TAGBILARAN CITY, Bohol, October 20 (PIA) -- Magpaabut pa og usa ka buwan aron makapangita ang Talibon ug ang Sevilla og lugar nga katukoran sa Tilapia Hatchery Facility samtang andam na ang luna nga magamit alang sa susamang pasilidad sa Valencia ug sa Pilar.
Kini usab samtang gi-andam na sa Sangguniang Panlalawigan ang resolusyon sa pagtugot kang Gobernador Erico Aristotle Aumentado nga molagda sa kasabutan tali sa mga kapartner niini sa nahisgutang proyekto.
Sa nahisgutang proyekto, si Gob Aumentado maoy molagda sa katungod sa Bohol samtang ika-agbat niya sa Memorandum of Agreement ang Bureau of Fisheries and Aquatic Resources Region 7 (BFAR-7) ug ang mga Municipal Local Government Units sa Valencia, Talibon, Pilar, ug Sevilla.
Kahinumduman nga una na nga gi-angkon sa kagamhanang probinsyal sa Bohol ang panginahanglan sa pagduso sa seguridad sa pagkaon.
Kini pinaagi sa pagpadaghan sa pagkaon nga makuha, ug sa tilapia, ang pagpakusog sa produksyon sa mga kabarangayan pinaagi sa paspas nga pagpakat-on sa katawhan sa teknolohiya sa pagpamuhi og isda sa tab-ang, tukmang pagdumala niini ug ang kahinguhaan gikan sa tubig-tab-ang.
Niini, nakit-an sa Bohol ang potensyal sa Valencia, Talibon, Pilar, ug Sevilla, isip maayong sentro sa pag-ugmad teknolohiya sa pangisdaan sa tubig-tab-ang.
Nakita na ni Gob Aumentado ug mga opisyales nga ang pagpahimutang sa Tilapia Hatchery Facility makatabang sa pagpa-dugang sa kita s amga mag-uuma ug magpamaayo pa sa kuhaanan sa mas maayong kalidad nga tilapia fingerlings.
Sa katungod sa Bohol, magkinahanglan kining mopagawas og P1.5M alang sa matag lungsod nga tukoran sa pasilidad, pagpangita og mga experts alang sa konsultasyon, networking, pagbansayug ang suporta nga teknikal sa paghimo na unya sa monitoring and evaluation sa pasilidad, kauban sa BFAR.
Sa laing bahin, ang mga nahisgutang lungsod nga tukoran sa pasilidad, kinahanglan nga makapakita og lugar nga haum sa proyekyo nga dili momenos sa 5,000 metros kwadrado alang niini.
Naghimo usab sila sa binuwan nga taho, updates ngadto sa Bohol-BFAR monitoring team, magtagana og pundo alang sa pagpadagan, pagpahiuli kon may madaut sa pasilidad ug ang pagpahiluna sa kwalipekadong tawo alang sa seguridad, pagdumala ug pagpadagan sa pasilidad.
Sa pasiuna nga kasayuran, matud pa ni Bise Gob Dionisio Victor Balite, ang Valencia ug Pilar may igo na nga luna nga iya na sa kagamhanan aron barugan sa pasilidad.
Ang gitumbok sa Talibon ug sa Sevilla nga luna alang sa pasilidad, hinuon, dili iya sa gobernor kon dili may pribading mga tag-iya.
Kombinsido na ang SP nga angay lamang ipadayon ang maayong proyekto, ug tugotan pinaagi sa resolusyon si Gob Aris, apan magpaabut pa sila og usa ka buwan nga gitagal aron makapangita ang nauwahing mga kalungsuran sa ilang katukoran sa Tilapia Hatchery Facility.
Ang kagamhanan sa Valencia, mingtagana na sa luna didto sa Barangay Marawis, samtang ang Pilar, adto itukod sa Cagawasan Pilar.
Magpaabut na lang ang SP sa ikataho sa Talibon ug Sevilla kon nakapalit na ba sila sa luna alang sa pasilidad.
Una na nga gisugyot nga adto itukod sa Brgy. Magsaysay ang sa Talibon nga hatchery samtang sa Poblacion Sevilla usab ipabarug ang Tilapia Hatchery Facility niini. (RAHC/PIA-7 Bohol)
Comments
Post a Comment