Produksiyon sa isda ipausbaw sa BFAR, Calape

 

TAGBILARAN CITY, Bohol, October 2 (PIA) -- Ang kagamhanang lungsod sa Calape nipasalig og P3 milyones isip katugbang niini sa mga programa ug proyekto sa Department of Agriculture Bureau of Fisheries and Aquatic Resources (DA-BFAR).

Ang pasalig gihimo atol sa ceremonial signing sa memorandum of agreement nga gipahigayon niadtong Setyembre 29, sa BFAR National Mariculture Center (NMC) satellite office sa lungsod sa Calape.

Gipangunahan nila ni Gobernador Erico Aristotle Aumentado ug Calape Mayor Julius Caesar Herrera uban ni BFAR national director Demosthenes Escoto ang kalihukan nga gipahigayon sa Calape fish landing port sa dalan Pangangan, barangay San Isidro sa maong lungsod.

Mitambong usab sa maong okasyon sila BFAR 7 regional director Dr. Allan Poquita, ug BFAR NMC chief Dr. Jericardo Mondragon.

Matud pa ni Jeric Piloton sa BFAR NMC, ang satellite office nga natukod sa pakigtambayayong sa lokal nga kagamhanan sa Calape nagbukas sa kahigayonan sa pagpataas sa socio-economic status sa mga mangingisda sa maong komunidad.

Tungod niini, ang mga mangingisda ug mga stakeholders makakuha og akses sa mga proyekto ug programa nga gitanyag lakip na ang teknolohiya ug pinansyal nga tabang gikan sa BFAR NMC.

Usa ka hiniusang paningkamot sa BFAR NMC, BFAR sentral ug rehiyon 7 sa pakigtambayayong sa kagamhanang probinsyal ug munisipyo, ang proyekto nagtumong sa paghatag ug kahigayonan sa disenteng panginabuhian sa mga mangingisda ning bahina sa probinsiya.

Naglakip kini sa pagproseso sa isda, pasilidad sa acclimatization, produksiyon sa pula nga tilapia ug mga kulungan sa isda alang sa marikultura aron tugotan ang tilapia nga mohaum sa kalikopan ug paspas nga mosanay.

Gibutyag ni Aumentado nga ang pagtinabangay nga mga paningkamot kabahin sa long-term nga tumong sa pagpataas sa produktibidad ug pagpaubos sa presyo sa isda.

Iyang gipasalamatan ang BFAR sa mga programa niini nga gipatuman sa lalawigan sa Bohol.

Gipadangat usab ni Aumentado ang iyang pahalipay kang Herrera sa iyang pagkugi nga makabaton sa katumanan ang mga ginahandom nila nga mga pag-uswag sa katawhang Calapenhon.

Gipasalig sa gobernador nga andam kanunay ang kagamhanang probinsiyal sa pagsuporta sa lungsod sa Calape. (ECB/PIA7-Bohol)