TAGBILARAN CITY, Bohol, September 21 (PIA) -- Nipasidaan ang Department of Information and Communications Technology (DICT) nga “punishable by law” ang pag-upload og mga hulagway sa mga mananap ug paghatag og sayop nga impormasyon sa subscriber identity module (SIM) registration.
“Technically speaking po, may violation ‘yun which is fineable… So ‘pag nalaman namin kung sino ‘yung nagregister at ni-report din sa amin, we can use the SIM card registration law to go after that person,” matud pa sa pahayag ni DICT Undersecretary Jeffrey Dy.
Busa ang pahinumdom ni Dy sa publiko, ubos sa balaod sa pagparehistro sa SIM, ang paghatag og false identity o bakak nga pagkatawo, namakak ug bisan ang wala nahibal-an nga pagpalit ug pagbaligya sa narehistro nga SIM giklasipikar isip mga kriminal nga buhat.
Ang silot niini mao ang gikan sa unom hangtod duha ka tuig nga pagkabilanggo o multa nga dili moubos sa ₱100,000 apan dili molapas sa ₱300,000.
Kahinumdoman nga niadto lamang Setyembre 5, ang mga opisyal sa National Bureau of Investigation (NBI) nitug-an sa pagdungog sa Senado nga dunay nagparehistro og SIM gamit ang hulagway sa unggoy.
Gibutyag ni Jeremy Lotoc, hepe sa NBI Cybercrime Division, nga gipugos sa ahensya nga iparehistro ang SIM nga gipalit gikan sa lainlaing telecommunications companies isip kabahin sa imbestigasyon niini.
Matud pa ni Lotoc nga gisulod nila ang nawong sa mananap ug lain-laing mga ngalan, ug gidawat gihapon kini.
Matud pa ni Dy nga gi-verify sa DICT ang authentication sa mga identification card nga gisumite alang sa registration gamit ang database gikan sa lain-laing ahensya.
Gidugang niini nga gi-compile na ang mga datos, apan ang mga telecommunications companies ang nagdumala sa registration system.
Samtang gipahinumdoman gihapon sa DICT ang publiko nga magbinantayon ug alerto batok sa pagpanghack pinaagi sa text scam. (ECB/PIA7-Bohol)
Comments
Post a Comment