TAGBILARAN CITY, Bohol, July 31 (PIA) -- Kung walay nga suliran ang mga power plants ug mga power generators sa Visayas, wala unta’y problema kay aduna pa gani sobra ug wala magamit nga 1,600 megawatts sa koryente dinhi sa rehiyon.
Kini maoy gibutyag ni Senador Win Gatchalian, samtang iyang gipadayag ngadto sa mga lider sa negosyo sa rehiyon ang kinatibuk-ang sitwasyon sa gahum dagitab sa Central Philippines.
Gidason sa senador ang dako nga kalambigitan sa kasaligan nga supply sa koryente ngadto sa ekonomikanhong pag-ugmad.
Apan, sumpay niya, kay ang supply sa koryente nagsalig usab sa permi nga maayong kondisyon sa mga power plants ug ang linya nga magpadangat sa koryente dinhi sa Visayas, mahimong may suliran pa gihapon ang Visayas.
Gawas pa, gipasabut usab niya nga 60% sa supply sa koryente sa nasud nagsalig sa uling nga sugnod, ug sa 60% nga uling nga paliton gikan sa laing nasud, 79 % niini gikuha sa Pilipinas gikan sa Indonesia.
Nahingawa ang kagamhanan sa kadelikado kon pananglit ang mga suppliers sa uling nga gigamit sa koryente sa nasud, makalit lamang og pamahal, o undang sa supply.
Tungod niini, gitutokan sa kagamhanan ang pag-ugmad sa mas barato nga tinubdan nga ania lamang sa nasud.
Si Senador Gatchalian, kinsa vice chair sa Senate Committee on Energy mingtug-an sa mga naghingawa ng amga negosyante sa Visayas sa sitwasyon karon nga may mga nasinati nga mga pagkapawong sa serbisyo sa sugang dagitab ug sa nagsingabut nga El Nino nga magpakuwang unya sa tubig nga gisaligan sa rehiyon sa hydro power.
Sa higayon nga may maga preventive maintenance activity sa mga planta, natural magkuwang ang supply.
Matud niya, nanginahanglan usab ang goberno ug mga pamuhunan, ilabi na sa dugang mga tinubdan sa gahum dagitab, bisan pa nga may mga giaprobahan na ug mga gipangduso sa Senado nga service contracts alang sa supply sa gahum dagitab alang sa nasud, sugid niya sa mga negosyante.
Partikular nga gilantaw sa kagamhanan karon ang pamuhunan sa competitive renewable energy (CRE) isip limpyo nga tinubdan sa gahum dagitab, matud pa ni Gatchalian.
Kasamtangan nga anaa pa sa 16,600 megawatts ang narehistro nga peak load sa Visayas, matud pa usab sa National Grid Corporation of the Philippines (NGCP).
Apan sa pagsumpay niini sa Luzon ug niining bag-o pa lamang, ang gisuwayan na nga Visayas Mindano Interconnection Project, milaum ang senador sa mas daghan pang kasaligan nga supply sa koryente nga igo pa sa rehiyon ug gani, pwede pa ikapadala ngadto sa Luzon.
Matud ni Gatchalian nga nga niadto pa nga 2020 unta matapos ang interconnection sa Visayas ngadto sa Mindanao, aron masumpay na ang interconnection project sa tibuok nasud.
Apan segun sa NGCP pinaagi sa hepe sa Visayas Transmission System sa NGCP nga si Michael Baylosis, tumong nila nga ianam-anam og testing ang kalig-on sa Visayas Mindanao Interconnection, diin may madugang pang 200 ngadto sa 400 megawatts usab nga supply kon matibawas na ug mahipno ang initial connection. (RAHC/PIA-7 Bohol)
Comments
Post a Comment