SIQUIJOR, Siquijor, Aug. 9 (PIA) -- Lain na usab ka mabungahong pagbansaybansay kon training kabahin sa Information Communication Technology and Communication System alang sa pagpangandam sa kalamidad ang gipadangat sa Department of Information and Communications Technology (DICT) ug National Telecommunications Commission (NTC) ngadto sa 40 ka mga partisipante gikan sa nagkadaiyang pribado ug publikong ahensya nga katugbang sa mga operasyon kung aduna'y mga emerhensiya.
Ang upat ka adlaw nga effective disaster preparedness training, inisyatibo sa Siquijor Provincial Disaster Risk Reduction and Management Office nga giulohan ni Provincial DRRM Officer Blezela Mae Omictin ug suportado sa probinsyal nga kagamhanan sa Siquijor.
Kini gihimo kauban sa mga resource persons nga sila Engr. Ira Bermudez, Engr. Jimmy B. Ratilla, Engr. Cary Flores sa DICT, ug Engr. Darren E. Melon sa NTC.
Gi bansay pag-ayo sa mga tinugyanan sa maong ahensya ang mga kalakip nga detalye nga nag pokus sa information communication technology ug communication system training nga makatabang sa pagpadayon sa operasyon sa mga responders panahon sa kalamidad.
Ug tungod kay bililhon man ang hustong impormasyon ug napanahon nga teknolohiya, ang paghashas sa mga partisipante pinaagi sa workshop makatabang dili lang kanila nga tinugyanan sa katungod sa pagserbisyo sa katawhan, kun dili sa tanang lumolupyo nga posibleng maapektaran sa di matagna nga panghitabo. (NRO/PIA7 Siquijor)
Comments
Post a Comment