TAGBILARAN CITY, Bohol, June 15 (PIA) -- Makapanakop ug maka-impound ba ang mga tinugyanan sa Land Transportation Franchising and Regulatory Board (LTFRB) sa mga masakpang mga colorum vans sa ilang mga lightning checkpoints sa kadalanan?
Matud ni LTFRB Regional Director Col. Eduardo Montealto Jr., sa Department of Transportation (DOTr) ug LTFRB Joint Administrative Order (JAO) No. 2014-01 nga wala maghisgut nga pwede ang LTFRB nga manakop ug mag-impound sa mga colorum vans, bisan pa kon wala nila ikauban ang Land Transportation Office (LTO) sa operations subay sa DOTr nga JAO, apan sanglit ang LTFRB, igsoon ra nga ahensya sa DOTr, diin mapailawom ang LTO, dili kini suliran.
Didto sa Transportation Forum nga gipatawag ni Gob Erico Aristotle Aumentado pinaagi sa Bohol Provincial Tourism Office didto sa Panda Tea Gardens sa miaging semana, gipangayuan og tin-aw nga pahayag si Director Montealto sa mga legal nga operators sa transportasyon nga nag-alagad dinhi sa Bohol, kabahin sa pahayag ni Justice Secretary Jesus Crispin Remulla.
Sa iyang personal nga panahum ug dili gyud opisyal nga posisyon sa Department of Justice, matud sa DOJ nga wala ipaklaro sa JAO nga makapanakop ug maka-impound ang LTFRB kon dili niini ikauban ang LTO sa pagpanakop.
Apan, subay sa Executive Order (EO) No. 202, nga nagmugna sa LTFRB, nakabutang didto nga lakip sa ilang gimbuhaton isip buhatan ang pag-impound sa mga sakyanan nga makalapas sa balaod.
Dugang ni Director Montealto, nga sanglit ang DOTr mao ra usab ang inahan nga buhatan sa LTO, dali ra kaayo nga hipnoon ang pagpadeputize usab sa LTFRB isip may katungod na sa pagsita sa mga salaud sa mga sakyanan, aron dili na kinahanglan pa nga mag-uban sa LTO.
Giangkon ni Yvonne Campoamor-Auza, hepe sa LTO Tagbilaran nga kuwang gyud ang ilang tawo mao nga lisud nga kuhaan ang mga tawo sa opisina aron mag-uban sa LTFRB sa ilang mga checkpoints aron pagsumpo sa colorum dinhi sa Bohol.
Dugang pa, sanglit ang LTO tua mag-opisina sa Sugbo, lisud usab ang koordinasyon niini sa LTO kon may pagahimoon pa nga kinalit-kalit nga pagpanakop.
Niini usab, gitanyag ni Gob. Aumentado ngadto sa LTFRB nga magbukas og District Office sa Bohol, kay may libre nga opisina nga ihatag ang gobernador.
Gawas sa tanyag nga libre nga office space alang sa LTFRB, mopabutang pa usab ang gobernador og mga casual nga trabahante aron maoy motabang pagpadagan sa district office, aron lamang solbaron ang suliran sa colorum.
Dili usab maayo, matud pa ni Gob Aumentado nga desk lang sa LTFRB ang magbukas kay dili niini mahimo ang tuyo gyud nga mahitabo nga dunay fully operational LTFRB team nga modawat usab sa mga aplikasyon sa prangkisa dinhi sa Bohol.
Daghang operator sa colorum nga vans ang misaway sa LTFRB sa ka mahal ug sa kalisud sa pagkuha sa prangkisa, ilabi na kon ang sakyanan, gamiton usab sa pangturismo nga katuyuan.
Hinuon, momahal ang pagkuhag prangkisa sa LTFRB kon kini ipa-agi og fixer, mao nga aghat ni Montealto, wala ray P5 mil ang prangkisa, kay pletehan pa paingun sa Sugbo.
Dili usab makakuha og prangkisa alang sa pangturismo nga serbisyo ang mga sakyanan nga dili sa current year ang modelo ug kinahanglang napulo ka buok ubos sa usa ka prangkisa, o magconsolidate ang tagsatagsa ka tag-iyahan sa unit ngadto sa us aka kooperatiba sa transport aron dili na kinahanglan pang ang usa ka tag-iya mopalit of 10 ka units.
Ang mga operators sa colorum nga mga sakyanan, makig-ambas usab sa mga legal nga operators ug kasagaran, maghikaw sa mga tarung nga operators sa mga pasahero, hinungdan sa kubos ang kita ngadto na sa pagka-alkanse.
Sa laing bahin, ang kasagarang colorum van nga madakpan ug ma-impound, makuha lamang kon marehistro na isip legal nga pasaheroan nga may prangkisa, o makabayad sa multa nga moabut sa P300 mil. (RAHC/PIA-7 Bohol)
Comments
Post a Comment