TAGBILARAN CITY, Bohol, June 15 (PIA) -- Nagka-ubos ang kadaghanon sa mga tawo sa usa ka bubong sa Bol-anon nga banay.
Segun sa Philippine Statistics Authority (PSA), Bohol Statistical Office, sa 2020 nga Census on Population and Housing (CPH), ang average household size sa Antequera, anaa na sa 3.9, ang labing gamay nga average household size (AHS), ug ang labing daku, ang sa Lila nga anaa sa 5.3.
Hinuon, matud sa PSA, ang Bohol sa 2020 mitala og AHS sa 4.3, nga mas taas pa sa regional AHS nga anaa lamang sa 4.1.
Sa 2010, ang kanhi AHS sa Bohol niadtong panahona, anaa pa sa 4.8.
Sa lain’g bahin, niadtong 2000, miabut sa 5.3 persons ang AHS sa matag banay nga Bol-anon.
Kini samtang ang populasyon sa Bohol sa 2020 nga CPH, nasumada sa PSA nga miabut na sa 1,394,329, ug ang kabag-on sa populasyon, magbutang sa 292 ka tawo sulod sa us aka kilometro nga luna.
Ang mga lungsod nga may AHS nga sama sa regional average mao ang Clarin, Loon, Mabini, Sagbayan ug San Isidro.
Kadtong mga lungsod nga dagway og nakakuhag mas maayong pagkontrolar sa nagbuliskad nga populasyon mao ang Anda, Maribojoc ug Sikatuna nga may 4.0 AHS.
Apan kay ang AHS sa Bohol sa 2020 anaa man sa 4.3, ubos pa gihapon ug maayong pagkadumala sa populasyon sa Alicia, Balilihan, Calape, Candijay, Catigbian, Duero, Guindulman, San Isdro, Tubigon ug Ubay nga anaa sa 4.2 ang AHS. (RAHC/PIA-7 Bohol)
Comments
Post a Comment