TAGBILARAN CITY, Bohol, July 24 (PIA) -- Kinatibuk-an nga P20.7B ang bili sa mga bag-ong pamuhunan nga misulod sa Bohol gikan sa dagkong Negosyo ngadto sa micro, small, medium enterprises ug miabut sa 33,982 ka mga bag-ong trabaho ang misulod sa Bohol sa 2023.
Kini maoy unod sa taho ni Gob Erico Aristotle Aumentado, sa iyang State of the Province Address (SOPA) nga iyang gibatbat atubangan sa nagkatapok nga mga Bol-anon ug mga bisita didto sa Bohol Cultural Center atul sa 169th Bohol Day, Hulyo 22.
Matud niya, ubos sa Business Development Program sa Kapitolyo, ang mga pamuhunan gikan sa dagkong negosyo, o kadtong molapas sa P100 million ang capitalization, mikabat sa sa P9.7B sa 2022 samtang kadtong mga MSMEs, mitampo usab og P11 bilyones nga bili sa pamuhunan.
Ang pagpasugod og mga trabaho gikan sa dagkong mga negosyo nga mingsulod, nakapatrabaho sa 2,982 ka walay kanhing trabaho samtang sa MSME nga pamuhunan, kinatibuk-ang 31,000 ka mga trabahante ang napaseguro nga may sweldo nga madawas sa quincena ug katapusan.
Sa laing bahin, gitaho usab sa Gobernador, kinsa nagsunod usab sa lakang sa iyang amahan nga kanhi gobernador Erico Aumentado kansang panglantaw sa Bohol nga lingkawas na sa kawad-on, may igong tinubdan sa koryente, tubig, irigasyon ug imprastraktura nga may gipatuman nga dinagkong proyekto aron maseguro ang lahutay nga pag-ugmad sa lalawigan ug katawhan, nga dinhi sa Bohol, sa 265 ka bag-ong mga korporasyon ug pagkurambosay, mikabat usab sa P376M na ang napatigum nga kwarta nga ikapamuhunan sa mga kroporasyon sa ilang mga proyekto.
Niini, matud sa gobernador, 52% kini nga mas taas pa kay sa napatapok nga paid up capital sa 2021.
Sa pagpangaghat sa Bohol nga makasulod dinhi ang mga dagkong mamumuhunan aron makadugang sa kwarta nga molibot sa ekonomiya ug dugnag mga trabaho , duha na ka Business Process Outsourcing companies ang nakapatrabaho sa kapin kon kulang 5,000 ka trabahante nga regular ug 20,000 ka mga nagtrabaho sa freelance nga pamaagi. (RAHC/PIA Bohol)
Comments
Post a Comment