Mahal nga pletehan, dala sa kapakyas paghimo’g LPTRP

 

CORTES, Bohol, June 13 (PIA) -- Kon sa inyong lugar, menos ang kasakyan ilabi na kon kini, sa sulod sa inyong lungsod, kana kay napakyas ang inyong local government units (LGUs) sa pagpanday sa inyong Local Public Transport Route Plan (LPTRP).

Kini maoy gibutyag  sa Land Transportation and Franchising Regulatory Board (LTFRB) pinaagi ni Engr. Eduardo Montealto Jr., kinsa mipadayag nga kasagarang suliran sa panakyanan, nagsugod sa kakuwang niini.

Ang kakuwang usab sa panakyanan nagsandig sa ruta nga pwede niining alagaran.

Ang LPTRP maggikan sa LGUs tungod kay sila ang nasayud sa ilang mga kadalanan nga bukas na, ug sa kadaghanon sa mga manakayan, aron usab dili maalkanse ang mga mamumuhunan

Kon makapanday na ang Sangguniang Bayan sa usa ka lungsod sa LPTRP alang sa mga ruta nga sudlan og sakyanan pamasahero-an, kini maaprobahan na sa LTFRB, kinin a ang panahon nga ang mga negosyante sa panakyanan magtigum og labing menos 15 ka units nga maalagad sa nasampit nga ruta, aron usab makompleto  ang rekisitos sa LTFRB.

Kon makompleto na,magsugod na og apply ang mga tag-iyag pasaheroan sa Certificate of Public Convenience aron makakuhag prangkisa alang sa ruta nga iyang daganan.  

Una na  nga gihangyo sa mga pasahero ug manakayan ang pagpabutang unta og ruta gikan sa Panglao Airport ngadto sa Lourdes, Tawala, Poblacion, Doljo balik sa Airport.

Kini aron masumpo na ang kamahal sa kobransa sa mga tricycle ug vans nga maghatud og pasahero ngadto sa mga beach resorts.

Sa kasamtangan, labing menos P100 ang pangayo sa tricycle alang niining rutaha, ug may panahon pang moabut sa P500, segun sa mga tinubdan.

Sa mga ruta nga motadlas na sa mga utlanan sa kalungsuran, ang Provincial Government pinaagi sa Sangguniang panlalawigan na ang magpanday sa LPTRP aron kabutangan na og mga sakyanan nga mosubay diha nga mga ruta.

Sa dugay nan ga panahon, walay naduso sa LTFRB nga LPTRP hinungdan nga wala usay mga bag-o nga ruta nga nasudlan og mga sakynaan.

Karon pananglit, samtang nangasumpay na ang mga kadalanan, daghang bag-ong mga kadalanan ang wala pay ruta nga nag-agi, hinungdan nga mapugos ang katawhan sa pagsakay sa habal-habal nga medyo mahal ang pletehan.

Si Gob Erico Aristotle Aumentado, human sa pila ka tuig nga walay nagduso og LPTRP,  karon naningkamot nga makaduso ang Bohol sa LPTRP aron mapun-an na ang mga sakyanang pangpubliko.

Matud ni Col Montealto, gibalik pa ang giduso nga LPTRP nga giduso sa Bohol aron ikapahigayon ang mga rebisyon, sa dili pa kini opisyal nan ga buksan sa LTFRB. (RAHC/PIA-7 Bohol)

Usa ka task Force ang nahunahunaan ni Bohol Gob Erico Aristotle Aumentado aron maoy mangsita sa mga colorum nga mga sakyanan nga namasahero bisan kon walay prangkisa, aron usan mamenosan ang alkanes sa mga naglegal og kuhag prangkisa apan maligsan sa mga colorum. (PIA Bohol)