TAGBILARAN CITY, Bohol, July 6 (PIA) -- Gipa-amping sa Department of Budget and Management (DBM) ang publiko batok sa pagpahimos sa mga indibidwal nga nagpakaaron-ingnon nga mga kawani niini ug mosaad og paspas ug siguradong transaksyon bugti sa porsyento sa kantidad nga ipahimo sa ahensya.
Gibarugan sa DBM ang integridad ug matinud-anon nga mga proseso ug transaksyon niini ug maampingon nga nagsunod sa gipatuman nga mga balaod, lagda ug regulasyon, ilabi na sa pagpagawas og pondo sa katawhan.
Gitumbok sa DBM nga ang pagsumite og mga request alang sa Local Government Support Fund–Financial Assistance (LGSF-FA) to Local Government Units (LGUs) pinaagi lamang sa Digital Requests Submission for Local Government Support Fund (DRSL) nga makita sa DBM Apps Portal ug ang tanang dokumentong isumite sa ubang paagi awtomatikong dili dawaton.
Ang DBM makigtransaksyon lamang sa mga local chief executive sa matag lokal nga kagamhanan sa tumong nga malikayan ang sayop nga representasyon sa mga scammer, middlemen, fraudulent individuals, o organized groups.
Giklaro sa DBM nga wala niini gikunsinti ug wala bisan kanus-a mihatag og awtorisasyon sa bisan kinsang indibidwal o grupo aron mangayo og salapi, goods o pabor bugti sa ipadali nga mga transaksyon, tungod kay klaro kining paglapas sa balaod ug adunay kaatbang nga silot.
Gi-awhag sa DBM ang publiko nga magbinantayon ug mag-amping sa pagdawat og tanyag nga tabang aron dili mahimong biktima sa pagpangilad ug kun gani adunay impormasyon kalabot sa susama nga ilegal nga aktibidad, isumbong dayon sa ahensya sa numerong (02) 865-7-3300.
Kalabot niini, gi-awhag sa DBM ang PNP-Criminal Investigation and Detection Group (CIDG) ug National Bureau of Investigation (NBI) nga hingosgan pa ang paglusad og operasyon batok sa mga fixer ug mangingilad aron mahunong na ang ilang mga ilegal nga binuhatan. (ECB/PIA7 Bohol)
Comments
Post a Comment