TAGBILARAN CITY, Bohol, May 19 (PIA) -- Si Presidente Ferdinand R. Marcos Jr. niadtong Martes nanawagan sa mga local government units sa paghimo sa ilang bahin sa pagpalig-on sa panagtambayayong tali sa nasyonal ug lokal nga kagamhanan aron mapauswag ang agenda sa kalamboan sa administrasyon.
Namulong atol sa oath-taking ceremony alang sa mga bag-ong napili nga mga opisyal sa Provincial Board Members League of the Philippines (PBMLP) sa Malacañang, si Presidente Marcos miingon nga ang nasyonal ug lokal nga gobyerno kinahanglang magtinabangay sa usag-usa sa pagpatuman sa nagkalain-laing mga programa nga gitumong sa pagpausbaw sa kinabuhi sa katawhan.
“We need your help in the national government. We have to work together. We have to know what the local conditions are. We have to know what… Hanggang sa political rivalries kailangan malaman natin. All of these things are important,” matud pa ni Marcos ngadto sa mga bag-ong napili nga lokal nga opisyal.
Matud pa sa Pangulo nga bisan unsa pa ka hayag ug kanindot sa mga plano, kung dili kini mapatuman, dili kaayo kini makaapekto sa katawhan.
Ang gipaningkamotan nga balansehon sa administrasyon, dugang pa sa Pangulo, mao ang pagpreserbar sa awtonomiya sa lokal nga kagamhanan ug sa samang higayon makapahimo sa mga LGU nga makatrabaho sa nasudnong kagamhanan.
Si Presidente Marcos misaad usab nga tabangan ang mga lokal nga kagamhanan, ilabina ang mga lungsod, sa pagpalambo sa ilang kapabilidad samtang ang nasudnong kagamhanan nagtugyan sa iyang katungdanan ngadto sa mga LGUs isip resulta sa Mandanas ruling sa Korte Suprema.
Niadtong Marso, gimanduan ni Marcos ang mga ahensya sa gobyerno nga tun-an ang Executive Order No. 138 alang sa posibleng mga pag-amendar ug aron madeterminar kung unsa nga mga gimbuhaton sa nasudnong gobyerno ang angay itugyan ngadto sa LGU subay sa desisyon sa SC sa Mandanas. (ECB/PIA7 Bohol)
Comments
Post a Comment