TAGBILARAN CITY, Bohol, April 26 (PIA) -- Ang gobyerno mihimo og bag-ong panawagan sa mga Filipino nga magparehistro sa ilang subscriber identity module (SIM) cards aron malikayan ang kahasol human giaprobahan ni Presidente Ferdinand R. Marcos Jr. niadtong Martes ang extension sa SIM card registration og 90 ka adlaw.
Sa press briefing sa Malakanyang, si Department of Information and Communications Technology (DICT) Kalihim Ivan Uy miingon nga giaprobahan sa Presidente atol sa sectoral meeting ang rekomendasyon sa Malacañang nga lugwayan og 90 ka adlaw ang SIM card registration.
Ang orihinal nga deadline sa pagparehistro sa SIM card gitakda sa Abril 26.
“So within that 90-day period, we urge our kababayans to take advantage of this extension to register the SIM cards
Busa sulod nianang 90 ka adlaw, among giawhag ang among mga kababayan nga pahimuslan kining maong extension aron marehistro ang mga SIM card,” matod ni Uy sa iyang pag-apelar sa mga Filipino kansang mga SIM card nagpabiling wala marehistro.
Nipasidaan kini nga human sa bag-ong deadline, kadtong mapakyas sa pagparehistro mawad-an sa tanang serbisyo, ang akses sa ilang SIM card, nga nagpasabot nga dili sila makatawag o makadawat sa mga tawag, ingon man sa mga text message.
Ang ubang mga kahasol mao ang pagkawala sa akses sa ilang mga e-wallet ug bisan unsa nga pinansyal nga serbisyo nga nalambigit sa mga SIM card.
Si Uy miingon usab nga ilang gisusi ang pipila ka mga opsyon nga magamit aron mahatagan og insentibo ang publiko sa pagparehistro.
Ang DICT mag-deploy usab og daghang mga tawo ug mga kahinguhaan sa mga isla o lugar alang sa pagparehistro sa SIM card.
Dugang pa, ang mga telcos, lakip ang National Telecommunications Commission (NTC), Philippine Statistics Authority (PSA), ug ang National ID System, nag-deploy sa ilang mga mobile units sa kadaghanan sa mga hilit nga lugar sa usa ka partikular nga panahon aron makatabang sa proseso sa pagrehistro. (ECB/PIA7 Bohol)
Comments
Post a Comment