Kapitolyo nagmugna og TWC sa organikong panguma ug molungtad nga food security

 

Gimugna ni Gob. Erico Aristotle ang TW Committee sa Natural ug Organic Food Security and Sustainability aron ikapamatuod ang panad sa seguro, luwas ug himsug nga pagkaon samatang ipaabante ang katungod samga Bol-anon sa luwas, masustansya nga pagkaon. (PIA Bohol)

TAGBILARAN CITY, Bohol, May 22 (PIA) -- Dungan sa pagkapasar sa lima ka mga organic farms ug sa ilang mga proseso sa Philippine National Standards for Organic Agriculture, gimugna usab sa Bohol pinaagi sa usa  ka Orden Ehekutibo ang usa  ka bahan nga magtutok sa seguridad ug katunhayan sa organikong pagkaon.

Kahinumduman nga pinaagi sa Bureau of Agriculture and Fisheries Standards (BAFS), nahukman human gisuhid ang mga produkto ug pamaagi sa Green Fields of Hope sa Balilihan, Green Thumb Farm sa Corella, Egays Farm sa Dauis, Atbang Farm sa Calape ug Jolits Eco Garden and Integrated Farm sa Batuan nga nahasubay sa standards alang sa organikong panguma.

Gimugna ni Gobernador Erico Aristotle Aumentado ang Technical Working Committee alang sa Seguridad sa Natural o Organikong Pagkaon duyog sa panaad sa Bohol alang sa seguro, luwas ug napanalipdan nga pagkaon samtang ipaasdang ang katungod sa katawhan sa luwas ug masustansya nga pagkaon ug   ang katungod sa balanse ug himsug nga kalikopan nga nagsabak sa kinaiyahan.

Gawas sa Chairperson ug duha   ka vice chairpersons alang sa internal ug external concerns, gilakipan usab sa gobernador og sectoral representatives alang sa a. Nasudnong ahensya sa kagamhanan, b. Institusyon sa Edukasyon, c. Tigproseso ug produksyon sa pagkaon, d. konsumidor, e, mga mag-uuma nga nagsagop sa organikong panguma, f. Non Government Organizations ug g. Simbahan.

Matud sa Gobernador, ang TWC sa Natural/ Organic Food Security and Sustainability Committee (NOFSSuC) magbaton og sub komite sa production enhancement, research and development, marketing Development, Policy Advocacy ug Training and Education.

Lakip sa mga gahum ug gimbuhaton sa NOFSSuC mao ang pagpatuman sa Bohol Organic Agriculture Code, magrekomendar sa paghimong profiles ug pagplano sa mga natural o Organikong Panguma, mga proyekto ug programa niini.

Magsugyot usab sila ug magpadali sa gikinahanglang research ug mga kabag-ohan aron makabaton ang Bohol og datus alang sa mga desisyon, o makaabag sa pagpanday sa balaod, samtang mgapatuman sa edukasyon, bansay sa mga teknolohiya sa malungtarong panguma ug mag-apil sa value adding, teknolohiya human sa ani, ug   ang pagkaplag sa mga dili maayong epekto sa kemikal ngadto sa tawo, mananap ug kalikopan.

Sila usab ang natahasan sa pagpadaghan sa organikong binhi ug ang pagpabarug sa Organic Seedbank, magabalaybalay sa  mga himan alang sa monitoring ug evaluation ug   ang pamaagi niini samtang magpabanhaw sa Genetically Modified Organism Task Force ug monitoring body.

Magrekomendar usab sila sa paghimog mga giya ug balaod sa pagpatuiman sa Amended National organic Law ngadto sa mga kabarangayan, samtang magagak sa pagpa-asdang sa mga ginaymay nga negosyo nga haum niini, aron makatukod na usab sa pamaligya aron makatabang sa pagtubag sa panginahanglan sa himsug nga pagkaon.

Sila usab magtabang nga magamit na ang potensyal sa BOATech isip sentro sa teknolohiya sa organikong panguma ug magpaseguro sa gimbuhaton sa academe nga magtudlo sa katawhan  sa kamahinungdanon sa lanat sa sistema nga buhi-on sa organic farming.

Sila usab ang magpahiluna sa sistema  aron makadawat og ganti ang mga LGUS nga magduso ug magbansay sa Organikong panguma ug natural nga pag-ugmad sa yuta.

Matud pa sa EO, magtudlo usab ang kalungsuran og mga focal persons sa Municipal Agriculture aron maoy maghiusa sa mga lakang pagpatuman niini.

Ang nahisgutang EO, gilagdaan sa gobernador, Mayo 18, 2023. (RAHC/PIA7 Bohol)