TAGBILARAN CITY, Bohol, April 24 (PIA) -- Ang Land Transportation Office (LTO) niadtong Domingo, Abril 23, nipahibalo nga ang validity sa tanang bag-ong rehistrasyon sa motorsiklo gilugwayan na ngadto sa tulo ka tuig.
Sa wala pa ang anunsyo, ang mga motorsiklo ra nga adunay mga displacement sa makina nga labing menos 201cc ang kwalipikado alang sa tulo ka tuig nga balido sa ilang pasiunang pagparehistro sa LTO.
Apan sa usa ka pamahayag, ang LTO mipahibalo pinaagi sa Memorandum Circular No. JMT-2023-2395 nga ang tulo ka tuig nga validity sa rehistrasyon sa sakyanan gihatag na usab alang sa mga motorsiklo nga adunay engine displacement nga 200cc paubos.
“Hindi natin nakikita na magkakaroon ng problema sa roadworthiness ng mga motorsiklong may tatlong taong rehistro dahil ang mga ito naman ay bagong sasakyan,” matud pa sa pahayag ni LTO chief Jay Art Tugade.
Matud pa ni Tugade, kining inisyatiba kabahin usab sa ilang gipatuman nga mga lakang aron mahatagan og dugang kasayon ang mga nagtransaksyon nga publiko.
Gibanabana nga duha ka milyon nga unit sa mga motorsiklo ang gilauman nga makabenepisyo niining bag-ong palisiya sa 2023.
Samtang ang LTO niingon nga ang mga motorsiklo nga adunay engine displacement nga 200cc paubos gikinahanglan gihapon nga magparehistro matag tuig sa higayon nga mahuman na ang tulo ka tuig nga validity sa ilang inisyal nga registration sa motorsiklo. (ECB/PIA7 Bohol)
Comments
Post a Comment