TAGBILARAN CITY, Bohol, April 27 (PIA) -- Nipagawas og abiso ang pamunuan sa Bureau of Fisheries and Aquatic Resources (BFAR) sa mga residente sa lalawigan sa Bohol ug tulo pa ka lugar nga dili luwas ang mga shellfish o kinhason sa mga baybayong dagat human magpositibo sa makahilo nga red tide.
Sa gipagawas nga abiso niadtong Abril 25 sa BFAR, ang mga lugar nga positibo sa makahilong red tide o paralytic shellfish poison nga nilapas sa regulatory limit mao ang mga baybayon nga sakop sa Dauis ug Tagbilaran City sa Bohol, coastal area sa San Pedro Bay sa Samar, Dumanquillas Bay sa Zamboanga del Sur ug Lianga Bay sa Surigao del Sur.
Hingpit nga gipahinumdoman sa BFAR ang mga residente sa nasangpit nga lugar nga kasamtangang gidili ang pagkaon sa tanang matang sa shellfish o kinhason ug alamang.
Samtang luwas ra kaonon ang mga isda, nukos, hipon ug alimango basta siguraduhon lamang nga presko kini ug limpyohan og maayo sama sa pagtangtang sa mga hasang ug tinae sa dili pa kini lutuon og maayo. (ECB/PIA7 Bohol)
Comments
Post a Comment