Prayoridad sa 4Ps: Kadtong Nalista na sa 2019 survey

 

CORTES, Bohol, March 24 (PIA) -- Resulta sa 2019 nga survey sa National Household Targeting System (NHTS) nga mas nailhang Listahanan ug wala mahiapil sa benepisyo ang naa sa prayoridad sa mga pwede madugang sa listahan sa mga mopuli nga benepisaryo sa Pantawid Pamilyang Pilipino Program (4Ps).

Kini maoy gibutyag ni Department of Social Welfare and Development 4Ps Bohol Cluster Supervisor Charo Poligrates, samtang nagpasabut nga dili kinahanglang aplayan o magparehistro aron mahiapil sa kapin sa 17,000 nga mga posibleng makabenepisyo sa programa nga may tanyag nga cash grants alang sa mga kabus.

Ug sanglit dyutay ra ang slots karon, siha-on og maayo sa DSWD ug Municipal screening teams ang ma-apil ug ikonsiderar ang mas nanginahanglan ug mas angay tabangan.

Kahinumduman nga human nakaltas ang kapin sa 17,000 sa kasamtangan nga mga aktibong sakop sa 4Ps, buksan na usab sa kagamhanan ang pagpangita sa mga papuli niadtong wala na sa listahan.

Nangatangtang na sa listahan sa mga modawat sa cash grant o conditional cash transfer ang pipila ka mga kanhi nahisakop sa 4Ps dihang minglagda sila nga magpatangtang na sa listahan, o nakit-an nga medyo ming-arang-arang na ang kahimtang.

May mga natangtang na usab human wala na silay mga sakop nga naa sa 0-18 o buntis.

May pipila usab nga natangtang tungod sa pagbalewala sa mga kondisyones sa 4Ps samtang may pipila usab nga natangtang tungod sa pag-abuso sa programa.

Sa mga kabus nga wala pa sa listahan ug buot masayud  kon nahi-apil na ba, tambag sa DSWD nga moadto sa maugalingong nga barangay halls aron subayon sa mga gipangpaskil nga mga listahan ang pangalan sa pangulo sa pamilya.

Kon bag-o lang nga nahitapnas sa us aka lugar, dayag sa DSWD, balika ang kanhiay nga barangay nga gipuy-an ug subaya sa barangay hall aron masuta kon nahiapil bas a lista didto.

Kon nahi-apil na, ipahibaw sa DSWD municipal link sa bag-ong lugar nga gipuy-an, aron makuka usab ang records ug mapabalhin ngadto sa bag-ong listahan sa lungsod.

Mipasabut usab ang DSWD nga ang listahan nga gikuhaan sa gipangpaskil karon, mahimo nga wala pa mag-apil sa mga bag-o lang nga natukod nga mga pamilya.

ALang kanila, gitambag ni Poligrates nga maghuwat na lamang sa sunod na usab nga round sa NHTS survey aron makit-an na didto ang ilang ngalan. (RAHC/PIA7 Bohol)

Sa mga nalista, importante nga modulo sa DSWD ilabi na sa ilang general assembly ug validation aron ikapakita ngadto sa ahensya ang mga papeles nga magsuporta sa pagkahilakip sa listahanan: marriage certificate o barangay certification sa pagtipon sa bana ug asawa, birth certificate sa mga bata nga iapil sa programa, school certification nga nagtungha ang bata ug barangay health certificate nga nagpadayon ang regular nga konsultasyon sa mga sakop sa banay nga nahilakip sa programa, saysay ni Charo Poligrates, DSWD 4Ps Cluster supervisor. (PIA Bohol)