Kawani nga di regular sa Lila, gipamembro sa SSS

 

TAGBILARAN CITY, Bohol, March 16 (PIA) -- Swerte ang nga trabahante nga nahire isip  job-order ug naka contract of service sa Lokal nga pangagamhanan sa Lila, Bohol, kay mahimo na silang makabenepisyo sa Social Security System (SSS) sa dili madugay.

Kini human gilagdaan na nila ni Mayor ug abogado Arturo Piollio II ug ni Atty Alberto Montalbo ang kasabutan sa mga partido kabahin sa pagpasakop sa ilang mga kawani ngadto sa SSS.

Si Atty Montalbo maoy SSS Vice President for the Visayas.  

Sanglit walay employer-employee relationship ang mga Job Order Workers ug mga na hire pinaagi sa Contract of Service, wala silay madawat nga mga benepisyo, ilabi na sa panahon nga masakit, manganak, maaksidente sa trabaho ug sa ilang mga tagtungod kon dili swertehon ug makabsan sa kinabuhi.

Apan sa pag-engganyo sa SSS Bohol pinaagi ni SSS Tagbilaran head Engr. Alieta Basubas ug sa mga tinugyanan sa SSS, nakita sa mga opisyales sa Lila ang kamaayo kon aduna gayuy seguridad ug dyutay nga proteksyon ang mga trabahante.

Human sa pagtugot usab sa Sangguniang Bayan pinaagi sa pagpanguna ni Bise Mayor Regina Salazar, gihatagan sa SB ang mayor sa katungod nga mopirma sa MOA tali sa SSS kabahin sa mga obligasyones sa lungsod ilabi na sa pagkolekta sa binuwan nga kontribusyon sa mga kawani ngadto na sa SSS.

Sa paglagdaay sa MOA nga nahitabo ug gisaksihan sa mga sakop sa SB sa Lila uban usab sa mga department heads ug sa mga opisyales sa SSS Bohol nga sila Assistant Branch Head Dioscoro Madanguit, Borly Bernales, Jo Comidoy ug Roger Noculan, mipadayag og kalipay ang mga representante sa mga kawani sa katikaran.

Sa kasabutan, ang mga kawani nga JO ug COS isipon nga self-employed members sa SSS, sanglit dili man  usab sila malakip sa Government Service Insurance System dala sa ilang employment status.

Pinaagi sa MOU, ang mga kawani sa Lila karon nga dili regular ug anaa sa plantilla nga posisyon, covered na sa SSS ug mahimong makadawat sa mga benepisyo sa SSS sa panahon nga gikinahanglan.

Sa MOA, ang LGU Lila na maoy magsilbe nga coverage ug Collection Partner sa SSS, ug dala niini, gitugotan na sa SSS ang kagamhanang local sa pagkolekta sa kontribusyon sa matag usa  ka bag-ong sakop ug pagremit niini nga binuwang nga responsibilidad pinaagi sa salary-deduction ubos sa SSS’ KaltaSSS-Collect Program.

Niini usab, sa higayon nga ang kawani nga dili regular, moundang na og trabaho isip kawani sa LGU, mahimo pa sila nga mopadayon sa ilang kontribusyon isip SSS voluntary members aron usab mapadayon pa nila pag-enjoy ang mga benepisyo ug mga pahuwam nga gitanyag sa SSS.

Gani, bisan anaa na sa regular nga posisyon apan nakasugod na og ka sakop sa SSS, mahimo pa gihapon nga motiwas sa kontribusyon isip voluntary members, segun sa SSS. (RAHC/PIA7 Bohol)

Sa ginagmay nga paagi, gi-atiman sa LGU Lila ang ilang nga kawani nga dili regular apan importante nga nagpadagan sa serbisyo nga gitanyag sa lungsod pinaagi sa pagpasakop kanila sa SSS aron may magamit pa gihapon nga tabang ang mga membro sa panahon sa kalisud. Ang Lila, apil na sa pipila pa ka lungsod sa Bohol nga nakigsabut sa SSS alang niining programa. (PIA Bohol)