TAGBILARAN CITY, Bohol, Feb. 15 (PIA) -- Ang mga tag-iya og sakyanan mahimo nang mag-renew sa ilang rehistrasyon sa sakyanan online gamit ang Land Transportation Office (LTO) Land Transportation Management System (LTMS) portal.
Sa usa ka pamahayag niadtong Martes, ang hepe sa LTO, Assistant Secretary Jose Arturo “Jay Art” Tugade, niingon nga ang mga tag-iya og sakyanan, lakip na ang mga pribadong indibidwal o kumpanya ug organisasyon, mahimong mogamit sa portal sa LTMS aron ma-renew ang rehistro sa ilang mga sakyanan nga dili na kinahanglang moadto pa.sa bisan asa sa mga buhatan sa distrito sa LTO.
Hinuon, si Tugade nagkanayon nga ang proseso magamit lang sa renewal transactions sa mga tag-iya og sakyanan nga adunay rehistrado nga LTMS portal account, ug kansang katapusang renewal transaction nahuman gamit ang LTMS.
Matud pa sa hepe sa LTO nga aron ma-renew ang ilang rehistro sa sakyanan online, ang mga rehistradong tag-iya kinahanglang mokuha una og certificate of coverage o insurance nga ilang gipili, ug ang sakyanan kinahanglang nakapasar sa roadworthiness test gikan sa private motor vehicle inspection center (PMVIC).
Giingong ang duha nga validated insurance ug ang MV inspection report (MVIR) ipadala sa elektroniko ngadto sa LTMS.
Kung matuman na ang tanang kinahanglanon, ang tag-iya sa sakyanan maka-log in sa portal sa LTMS aron makumpleto ang proseso sa pag-renew, lakip ang pagbayad online.
Matud pa ni Tugade nga kun ang plate number matapos sa 3, adunay tibuok bulan sa Marso aron makuha ang gipili nga insurance coverage, ipa-inspeksyon ang sakyanan sa bisan unsang PMVIC nga duol sa aplikante, ug i-access ang LTMS portal alang sa online renewal.
Ang LTMS portal mahimong ma-access pinaagi sa pagbisita sa https://portal.lto.gov.ph/ ug naglakip sa mga feature sama sa online driving course, driver’s license application, pagtan-aw sa traffic violations, ug uban pang impormasyon mahitungod sa mga transaksyon sa LTO. (ECB/PIA7 Bohol)
Comments
Post a Comment