TAGBILARAN CITY, Bohol, Feb. 9 (PIA) -- Gisugdan na sa Department of Social Welfare and Development (DSWD) Field Office VII ang pagpaskil sa master list sa mga potensyal nga benepisyaryo sa Pantawid Pamilyang Pilipino Program (4Ps) sa lain-laing lugar sa rehiyon sa Central Visayas.
Ang City and Municipal Action Team (C/MAT), nga gilangkoban sa mga kawani sa DSWD-7 gikan sa lain-laing mga programa, lakip na ang 4Ps City ug Municipal Links (C/MLs), nagbutang sa master list sa mga potensyal nga benepisyaryo sa 4Ps sa ilang gi-assign nga mga lugar.
Ang maong master list, uban ang kopya sa pahibalo, o advisory, gipaskil sa mga dapit nga makita sama sa mga barangay hall.
Ang advisory adunay kalabotan nga kasayuran, lakip ang gikinahanglan nga mga dokumento sama sa sertipiko sa kasal, sertipiko sa pagkahimugso, sertipiko sa pagpalista sa eskwelahan, sertipiko sa pagpalista sa kahimsog, balido nga kard sa identipikasyon (ID), o uban pang mga alternatibong dokumento ingon bahin sa pagsuporta sa mga dokumento nga ipresentar sa panahon sa validation.
Pipila ka mga Local Government Units (LGUs) ang gihangyo sa paghatag og libreng late birth registration sa mga posibleng benepisyaryo sa 4Ps aron makakuha og birth certificates gikan sa Office of the Local Civil Registrar.
Aron masiguro ang hapsay ug organisado nga rehistrasyon, gi-orient usab sa mga kawani sa DSWD-7 ang mga opisyal sa lokal nga kagamhanan, lakip ang mga local chief executives, city ug municipal councilors, local social welfare and development officers, ug mga punong barangay, sa proseso sa rehistrasyon.
Ang mga potensyal nga benepisyaryo sa 4Ps mopailawom pa sa validation atol sa gikatakdang community assembly sa ilang lugar aron maseguro nga mga kwalipikado lamang nga benepisyaryo ang maapil sa programa.
Ang mga lagyong lugar adunay mga pagbisita sa balay gikan sa mga kawani sa DSWD-7.
Magsugod ang validation period human sa 15 ka adlaw sa pag-post sa master list sa barangay.
Ang mga potensyal nga benepisyaryo gi-awhag nga makig-alayon sa mga opisyal sa barangay o sa C/MLs sa gikatakdang community assembly.
Magbutang usab ang departamento og grievance help desk atol sa community assembly aron makadawat og mga reklamo gikan sa mga potensyal nga benepisyaryo.
Ang DSWD-7 adunay kinatibuk-ang target nga 90,242 ka bag-ong 4Ps beneficiaries.
Ang lalawigan sa Sugbo, apil ang mga highly urbanized nga dakbayan, adunay 40,817 ka bag-ong benepisyaryo, gisundan sa Negros Oriental nga adunay 31,625; Bohol nga adunay 16,971; ug Siquijor nga adunay 829.
Ang mga bag-ong benepisyaryo sa 4Ps maoy mga puli niadtong migraduwar o mi-exit sa programa ug igo na sa kaugalingon, ingon man ang mga panimalay sa 4Ps nga adunay mga bata nga nakatapos sa ilang pagtungha sa senior high school ug walay nabantayan nga mga bata nga kwalipikado.
Ang listahan sa mga potensyal nga benepisyaryo sa 4Ps naggikan sa resulta sa Listahanan third round sa household assessment, nga gipahigayon niadtong 2019.
Ang Listahanan migamit og siyentipikanhong pamaagi nga gitawag ug Proxy Means Test (PMT), nga nagbanabana sa kita sa usa ka panimalay base sa mga variables nga gilakip sa household assessment form.
Ang mga panimalay nga adunay gibanabana nga kita nga labaw sa pinakaulahing provincial poverty thresholds gikonsiderar nga dili kabus, ug kadtong adunay gibanabana nga kita nga ubos sa poverty thresholds gikonsiderar nga kabus.
Gawas nga giila nga kabus gikan sa Listahanan, ang usa ka panimalay sa 4Ps kinahanglan adunay mga bata nga nag-edad og 0-18 o usa ka mabdos nga miyembro sa panahon sa assessment sa panimalay ug kinahanglan nga andam ug makahimo sa pagtuman sa mga kondisyon sa programa isip kabahin sa ilang co-responsibilities.
Ang mga kuwalipikadong 4Ps nga mga panimalay manumpa sa pasalig sa programa ug motuman sa mga kondisyon sa programa aron makapahimulos sa cash grants.
Naglakip kini sa pagtambong sa eskwelahan nga labing menos 85% matag bulan alang sa mga bata nga nagpalista sa preschool, elementarya, o high school; mga bata nga nag-edad og 5 paubos nga mopailawom sa preventive check-up nga gimando sa Department of Health (DOH); ang mga bata nga nagpalista sa elementarya makadawat og mga pildoras nga deworming kaduha sulod sa school year; Ang mga mabdos kinahanglang makadawat ug prenatal ug postnatal care, base sa protocol sa DOH; ug (mga) ginikanan o tigbantay nga motambong sa binuwan nga Family Development Sessions (FDS). (ECB/PIA7 Bohol)
Comments
Post a Comment