DOT7, BTO mipasiugda sa Bohol Loop 2023 karon’g Marso 17-19

 

TAGBILARAN CITY, Bohol, March 1 (PIA) -- Gibanabana nga 1,500 ngadto sa 2,000 ka mga motorista nga magdalag dagkong motor ang motapnas sa Bohol karong Marso 17-19 alang sa tulo ka adlaw nga Motor 7 Bohol Loop nga gipasiugdahan sa Department of Tourism Central Visayas, Bohol Tourism Office sa Buhatan ni Gob Erico Aristotle Aumentado ug sa kahugpungan sa mga motorista sa Pilipinas.
Tanyag sa DOT-7, isip kabahin sa Philippine Motorcycle Tourism, ang Bohol Loop kabahin sa kampanya nga gipangunahan sa Tourism Promotions Board Philippines (TPB), ang marketing ug promotions arm sa DOT aron usab pa-iktinon ang motorcycle tourism sa nasud.
Sa unang coordination meeting nga nahitabo Marso 1, napulo ka destinasyon sa mga turista ang subayon usab sa mga motorista sa ilang kapin kon  kulang 600 kilometros nga tadlas sa mga kadalanan  sa Bohol.
Ang Bohol Loop 2023 usa ka 600km mototourism nga kalihukan nga magduso sa turismo sa Bohol samtang ipaabante usab ang luwas nga pagbyahe.
Kini,  usa ka mototourism activity nga magtimbang sa lahutay, kamaayo sa abilidad nga mopadagan sa motorsiklo sa mga panginahanglanon sa kadalanan, pagsubay sa mga mapa nga agianan ug  ang pagdumala sa oras aron matapos ang kinatibuk-ang loop, sulod sa 42 ka oras.
Gibuksan ngadto sa tanang matang sa riders ug motorsiklo, ang Bohol Loop walay orasay, dili gukod ug walay premyo nga ihatag sa mga luwas nga makahuman sa loop.
Dinhi, pwede ang solo, tandem o trio, ug pwede usab makigdungan sa imong kagrupo ug kabarkada.
Ang tumong mao ang kalingawan samtang nagbyahe, nagpaasdang sa luwas nga pamaneho sa motor samtang magsuroy sa mga gibantug nga suroyanan sa Bohol.
Hinuon, puno na ug sirado na ang registration nga tag P2500 sa matag rider.
Mahitabo ang bike check in sa Marso 17, 2023 Biyernes ug magsugod ang byahe sa Tagbilaran City Start Grid sa alas 4:00 sa kaadlawon ug kinahanglan nga maka scan sa QR Code ang rider aron mailhan nga nakaapil sa loop.
Sunod, kinahanglang mobyahe paingon sa Anda alang sa unang checkpoint: didto sa Anda Tourist Information Center diin mag selfie ug group picture sa baybayon sa Anda White Beach, dayon mo scan na usab sa QR Code aron mailhan nga nakahuman na niini nga stop.
Dayon, mobyahe paingon sa checkpoint 2: didto sa Getafe Municipal Hall, diin mo scan na usab sa QR Code, unya molarga na usab paingon sa checkpoint 3: sa sulod sa Chocolate Hills Complex, diin gikinahanglan ang selfie o group picture samtang anaa sa Chocolate Hills Viewdeck, ug mo scan na usab sa QR Code.
Ang checkpoint 4: adto sa Tarsier Conservation Area, diin gikinahanglan ang selfie o groufie, wala nay QR Code, samtang sunod na ang checkpoint 5 didto sa Baclayon Church, diin importante ang selfie ug group picture, wala usab QR Code.
Sa checkpoint 6, kinahanglan nga makaadto sa Alona Beach, makapahulagway sa selfie ug groufie sa baybayon, walay QR Code ug gikan sa Alona, molahus sa checkpoint 7 sa Simbahan ni San Augustin sa Panglao, diin kinahanglang magpapicture selfie man o groufie, bisag walay QR Code.
Human niini, deretso na sa checkpoint 8: sa Loon Municipal Hall, diin tua na usab didto ang QR Code scanning, dayon molahus na sa checkpoint 9 didto sa Trinidad Municipal Hall, diin gikinahanglan ang pag Scan sa QR Code, sa dili pa mobyaheg balik ngadto sa checkpoint 10 sa Bilar Man-Made Forest, didto gikinahanglan ang selfie ug groufie, walay QR Code.
Human niini, adto na dayon sa checkpoint 11: sa Sikatuna Mirror of the World, kinahanglan ang selfie o groufie kay walay QR Code dinhi.
Ang Bohol Loop matapus sa Tagbilaran City Finish Grid diin mohimo na usab sa pag scan sa Finish QR Code.
Sa mga nakarehistro, mahimong makadaug sa brand new 2023 Kawasaki KLX150 trail offroad bike, may libre nga Bohol Loop shirt, Bohol Loop vest, Bohol Loop Riders ID, Bohol Loop Sticker ug Castrol Motorcycle Engine oil.
Sa mga makahuman sa Loop, may BL finishers longsleeves, BL finishers balaclava, BL finisher sticker, BL finishers Certificate ug BL finishers medal. (RAHC/PIA7 Bohol)