CEBU CITY, Cebu, Jan. 11 (PIA) -- Giawhag ang mga mobile phone users sa nasod nga magparehistro sa ilang Subscriber Identity Module (SIM) cards sa labing sayo nga panahon aron malikayan ang bisan unsang kahasol sa proseso sa pagparehistro.
Ang tanan nga mobile subscribers adunay 180 ka adlaw o hangtod sa Hunyo 27, 2023, aron marehistro ang ilang SIM card base sa gimando sa SIM Registration Act.Ang pagparehistro mahimong lugwayan sa dili molapas ug 120 ka adlaw.
Ang mga SIM card nga dili marehistro sulod sa gihatag nga panahon awtomatiko nga ma-deactivate.
"Moawhag mi sa publiko nga mag pa register dayun, dili ta maghuwat nga mo end na ang registration period aron wala nay inconvenience nga atong ma encounter, dili ta maghuwat nga magkaproblema" sigon ni Smart Group Corporate Communications Visayas Relations Head Marylou Gocotano sa gipahigayon nga Kapihan sa PIA program nga gi-organisa sa Philippine Information Agency Region 7.
Aron mas sayon, convenient, ug mas accesible ang proseso sa pagparehistro, ang mga telcos nagbutang og SIM registration assistance booth sa lain-laing dapit sa nasod.
Kini nga mga registration booth adunay mga kahimanan ug pasilidad nga gamiton sa pagtabang sa mga SIM card users sa ilang pagparehistro.
Nakig-alayon usab ang mga telcos sa nagkalain-laing local government units sa pagbutang og SIM registration booths sa ilang mga lugar ilabi na niadtong walay access sa internet connectivity.
"Ayaw kabalaka alang sa mga customers nga walay internet connectivity kay naa tay lain-laing SIM registration assistance booths" si Globe Corp Communications Manager for VisMin Rofil Magno miingon sa maong forum.
Gipahimangnoan ni Magno ang mga subscribers nga magparehistro lang gamit ang links nga gihatag sa mga telcos.
"Magbantay lang gyud ta kay naa daghan nga mga creative individuals kay ang link posible nga i-mask nila o pulihan niya i direct ka sa lain nga link. Go to the official legitimate website sa mga telcos aron nga di basta-basta makuha inyung mga data" dugang niya.
Base sa pinakaulahing datos sa SIM registration count, adunay dul-an sa 7.5 milyones ka Globe prepaid subscribers ang nakarehistro na sa ilang SIM cards niadtong Enero 11, samtang ang gidaghanon sa mga rehistradong Smart subscribers niabot sa 8,037,062 niadtong Enero 10.
Mahimong magparehistro ang publiko sa ilang SIM card bisan unsang orasa ug bisan unsang adlaw pinaagi sa mga SIM registration portals. Kung diin kini operational 24/7 ug ang registration process mokabat lang sa di mo menos 10 minutos.
Sa laing bahin, ang National Telecommunications Commission (NTC) Region 7 niingon nga wala silay naobserbahan nga dagkong mga kabalaka kalabot sa nagpadayon nga mandatory SIM registration gawas lang sa gamay nga problema sa sistema tungod sa kadaghan sa tiggamitan nga nag-access sa registration sites sa mga telcos.
"Wala ray nakita nga problem ang NTC sa implementation sa SIM Registration Act. Ang problem lang kay kung magdungan ang daghan og register, tungod sa volume, magka problem sa system problem pud ang pag upload sa photo, kay naay requirement ang MB sa photo nga iupload" matod usab ni NTC-7 Public Information Officer Engr. Bill Peralta.
Ang Republic Act 11934, o ang SIM Registration Act, nga gipirmahan nga balaod kaniadtong Oktubre 2022, usa ka pamaagi aron mabatukan ang pagdaghan karon sa text ug online scam messages, nga nahimong kaylap sa miaging mga tuig.(RGC/PIA7 Cebu).
(L-R, center): Si NTC-7 PIO Engr. Bill Peralta, Globe Corp. Communications Manager for VisMin Rofil Magno, ug Smart Group Visayas Relations Head Marylou Gocotano nagpaambit sa mga detalye ug kalambuan sa pagpatuman sa SIM Registration Act atol sa Kapihan sa PIA program niadtong Enero 11.(Screenshot via PIA7 FB Live)
Comments
Post a Comment