TAGBILARAN CITY, Bohol, Jan. 24 (PIA) -- Alang sa mga commercial courier ug cargo forwarders nga masakpan nga maoy gigamit sa pagpasulod sa illegal nga drugas, priso hangtud sa tibuok kinabuhi, gawas pa sa multa nga gikan sa tunga sa milyon ngadto sa napulo ka milyon ka pesos.
Kini maoy gipasabut sa Philippine Drug Enforcement Agency (PDEA) Bohol head ug Intelligence Officer III Ferdinand Kintanar, human gipangutana kabahin sa unsay nahimong salaud sa mga commercial courier companies ug cargo forwarders nga maoy gigamit sa mas sayun nga pagpayuhot sa illegal nga drugas sa Bohol.
Kini samtang gikataho sa PDEA ug Philippine Coast Guard nga halos walay drugas nga makalusot kuyog sa mga pasahero gikan sa gawas sa Bohol.
Una na nga gikataho sa mga tinugyanan nga nagpahimutang na sila og mga drug sniffing dogs ug mga security officers sa mga pantalan aron kapugngan ang pagpayuhot sa illegal nga drugas pasulod sa Bohol.
Gawas pa, gilaraw nga ipahiluna sa Philippine Ports Authority ang closed circuit television cameras (CCTVs) sa mga agianan sa mga mosulod nga mga pasahero gikan sa gawas sa Bohol.
Apan, namatikdan nga kon ang drugas ikarga sa mga sakyanan nga ikarga sa mga barko, luag kaayo ang seguridad dinhi ug possible nga malutsan ang Bohol sa dagkong bulto sa mga drugas.
May nahitabo na usab nga nasakpan ang usa ka commercial courier o cargo forwarder nga maoy gigamit aron makasulod ang illegal nga drugas sa Bohol, pipila na ka tuig ang minglabay.
Segun sa Section 5 sa Comprehensive Dangerous Drugs Act, kabahin sa pagpamaligya, pagpatigayun, pagdumala, pagpakatap, paghatud, pagpang-apud-apod ug ang pagpalarga sa gidili nga drugas, mga inila nga sahug niini ug mga kemikals nga ingredients, ang masakpan, mahimong madugta sa bilangguan.
Wala hinuon usab isulti didto kon may tulobagon ba ang kompanya nga inosente nga mingdawat sa padala, aron kini ikatugyan sa local nga mga consignees.
Sumpay sa Section 5, ang silot sa pagkabilanggo gikans a 12 ka tuig ug usa ka adlaw ngadto sa 20 ka tuig usab apil ang multa nga P100,000 ngadto sa P500,000 ang dangatan sa ni bisan kinsa nga mamaligya, magpatigayon, magdapat, magpakatag, magdeliver, manghatag ngadto sa uban, mag-apud-apod, magpadala ug magpalusot niining mga gidili nga drugas, kemikal ug nga sahop sa paghimo niini.
Subay sa nahisgutang balaod, mas mograbe pa ang silut kon kini nga mga pagdili nahitabo sulod sa 100 ka metros sa mga tunghaan, kanus-a, permi gyud nga ihapak ang labing pait nga silut alang niini.
Pareho ra usab ang silot ngadto sa mga drug pushers ma street level man o high value personality nga mogamit sa mga menors de edad o mga walay saktong pamuot isip tighatud, tigdala ug tigpakatag sa gidili nga mga drugas ug substances.
Gani, subay sa balaod, kon menor de edad o walay saktong panghunahuna ang biktimas pagpayuhot sa illegal nga drugas, ug kon kini mamatay sa paggamit sa drugas, ang mga sad-an lambusan sa labing taas nga silut sa priso hangtud sa tinuok kinabuhi ug multa nga salapi nga moabut sa P10 milyones.
Sa mga nagpadala usab sa mga illegal nga drugas pinaagi sa courier services, o kadtong matumbok nga maoy nagpadagan sa pagpadala, lambusan usab sa maximum penalty sa iyang ilegalnga kalihukan.
Gawas pa, 12 ka tuig ug 1 ka adlaw ngadto sa 20 ka tuig nga pagkabilanggo imprisonment ug multa nga gikan sa P100,000 ngadto sa P500,000 ang ipataw sa kinsa man ang mapamatud-an nga "protector o coddler" sa ni bisan kinsa nga napamatud-ang nakalapas niini nga nahisgutang balaod. (RAHC/PIA7 Bohol)
Comments
Post a Comment