PBBM mibisita sa Cotabato City karong adlawa alang sa inagurasyon sa Bangsamoro Transition Authority Parliament

Motambong si Presidente Ferdinand Marcos Jr. isip guest of honor sa INAGURASYON SA BANGSAMORO TRANSITION AUTHORITY (BTA) PARLIAMENT 2022-2025 sa Shariff Kabunsuan Cultural Center sulod sa Bangsamoro Government Center sa Cotabato City,karong adlawa, Septyembre 15, Huwebes.

Ang BTA

Ang BTA mao ang interim nga gobyerno sa Bangsamoro Autonomous Region in Muslim Mindanao (BARMM), samtang naghulat sa eleksyon sa mga opisyal sa gobyerno sa rehiyon, nga orihinal nga gitakda karong tuiga 2022.

Sa iyang kaugalingon usa ka parlamento, kini adunay ehekutibo ug lehislatibo nga gahum sa autonomous nga rehiyon.

Niadtong Oktubre 28, 2021, gipirmahan ni Presidente Rodrigo Roa Duterte ang Republic Act 11593 nga nagpalugway sa transition period sa BARMM gikan sa 2022 ngadto sa 2025, sa ingon gi-postpone ang unang regular nga parliamentary elections, nga idungan sa 2025 national elections. Ang Section 2 sa RA 11593, nagkanayon nga ang kasamtangang Presidente motudlo og laing set sa 80 ka miyembro sa BTA.

Naghatag kini og dalan alang kang Presidente Ferdinand Marcos Jr., sa pagtudlo sa mga bag-ong miyembro sa BTA. Ang bag-o ug re-appointed nga mga miyembro sa BTA -- 41 gikan sa Moro Islamic Liberation Front ug 39 gikan sa nasudnong gobyerno -- nanumpa atubangan sa Presidente niadtong Agosto 12.

UNITED BTA

Si Presidential Adviser on Peace, Reconciliation and Unity, Carlito Galvez mihulagway sa pagtudlo sa bag-ong BTA isip simbolo sa panaghiusa sa mga prenteng Moro, tungod kay iyang namatikdan nga kini gilangkuban na sa mga representante gikan sa Moro National Liberation Front (MNLF) Misuari ug Sema Groups ingon man ang mga anak sa mga nag-unang lider sa Moro Islamic Liberation Front (MILF).

“This is a united BTA because most of the new members came from the younger generations of Moro leaders which include the sons and daughters of both MNLF and MILF leaders [Nur] Misuari, [Muslim] Sema, [Yusoph] Jikiri, [Datu Udtog ‘Datu Jun’ Jr.] Matalam, [Gadzali Jaafar, Mimbantas] and Hashim Salamat, among others,” si Galvez miingon.

Dugang pa ni Galvez nga ang pagtudlo sa bag-ong BTA dili lang makasaysayanon kondili simbolo usab tungod kay ang peace process nagsugod sa panahon ni Kanhi Presidente Ferdinand Marcos Sr. ug hinaut nga molampos kini sa sunod nga unom ka tuig sa termino ni Presidente Ferdinand Marcos Jr.

ANG AWHAG SA PRESIDENTE ALANG SA BTA

Gipahinumdoman ni Presidente Marcos ang mga miyembro sa BTA atol sa oath-taking ceremony nga paspasan ang pagpatuman sa ilang mga deliverables, Bangsamoro Local Government Code, Electoral Code, Revenue Code ug Indigenous Peoples’ Code.