TAGBILARAN CITY, Bohol, June 2 (PIA) -- Ang Brgy. Cabagakian sa lungsod sa Dimiao ning bag-o lang nakadawat og 1-km concrete access road nga nagkantidad sa P7.5 milyon gikan sa Department of Social Welfare and Development (DSWD) pinaagi sa Kapit-Bisig Laban sa Kahirapan Comprehensive and Integrated Delivery of Social Services (KALAHI-CIDSS).
Ang maong proyekto nagsugod niadtong Agosto 2021 isip parte sa Kapangyarihan at Kaunlaran sa Barangay (KKB) nga pondo sa programa nga nagtinguha sa pagpalambo sa oportunidad sa panginabuhian samtang nagtubag sa nagkalain-laing kabalaka nga nakababag sa paglambo sa livelihood development sa usa ka komunidad.
Tungod sa bag-ong naugmad nga dalan sa Cabagakian, ang accessible social service facilities mahimo nang anaa sa maong lugar nga gisaad sa Local Government Unit (LGU) sa Dimiao.
Ang LGU Dimiao misaad sa pagtukod og barangay center diin ang akses sa basic social services sama sa rural health unit gisugyot nga itukod samtang nagtinguha alang sa pagpasaka sa zonal value aron daghang katawhan ang mosalig sa pagsugod og bag-ong negosyo sa komunidad pinaagi sa pagbukas og nga livelihood enterprises.
Ang implementasyon nahuman sa pito ka buwan, apil na ang capacity-building ug pagbansay sa mga volunteers.
“Sa akong pila ka tuig nga pagpanerbisyo sa katawhan, karon pa gyud ko nakasinati nga nahatagan og katumanan ang among gipangandoy nga access road gikan sa DSWD. Nahimugso ang among mga damgo tungod sa nagkahiusang pag paningkamot sa katawhan," matud pa ni kanhi Cabagakian barangay kapitan Proceso Lagumbay sa iyang natan-aw sa kausaban sa iyang komunidad gikan sa pangandoy kaniadto sa pagbaton og mga proyekto ngadto sa pagsaksi sa turnover ceremony tungod sa KALAHI-CIDSS.
Si DSWD Assistant Secretary Rodolfo Encabo, kauban si DSWD Field Office VII Assistant Regional Director for Administration Antonio Dolaota, nanguna sa pagtugyan sa maong proyekto sa komunidad ngadto sa katawhan sa Cabagakian. (ECB/PIA7 Bohol)
Comments
Post a Comment