Dive7 media tours sa Panglao Hunyo 3-6

TAGBILARAN CITY, Bohol, June 1 (PIA) -- Himoon dinhi sa Bohol ang tulo ka adlaw nga Dive7 Travel Trade and Media Familiarization Tour sa Junyo 3-6, 2022.

Matud pa sa Department of Tourism Region 7, ang Dive 7 Travel Trade and Media Familiarization Tour usa ka paagi sa pagpadayag sa mga natural nga talan-awon sa ilawom na usab sa kadagatan sa Bohol, ilabi na sa mga isla sa Panglao, Balicasag ug Pamilacan.

Samtang giila na ang Bohol nga usa sa mga destinasyon sa mga turista nga may daghang nindot nga mga talan-awon nga kasagaran, nakabase sa kinaiyahan, dili daghan ang nakasinati sa natural nga mga talan-awon niini sa ilawom sa iyang kadagatan.

Karon, samtang nangandam ang lalawigan sa kinatibuk-ang pagbukas sa iyang mga pultahan alang sa mga turista niining bag-ong normal, ang mga tinugyanan sa DOT, lakip na ang Bohol Tourism Office ug mga travel and tour Operators, nangandam sa pangtanyag sa mas daghan pang nindot nga kadulngan sa mga turista.

Bisan kon giila na sa mga mahilig sa Self Contained Underwater Breathing Apparatus (SCUBA) diving ang mga dive spots sa Bohol, nagtuo ang DOT nga bisan pa sa mga amateur divers ug snorkelers, mahimong dugokon usab ang mga nindot ug mabulokon nga talan-awon sa ilawom sa mga kadagatan sa Bohol.

Ang kadagatan sa Bohol ug mismo nga sa Central Visayas, kasagaran gitumbok nga usa sa labing himsug nga kadagatan sa tibuok kalibutan ug gitawag nga biodiversity hotspot tungod sa nia dinhi ang labing nindot nga lugar nga nag-awas sa mga pagkaon sa mga buhilaman ug sa mga mananap nga nia sa dagat.

Kini tungod kay napatung-an sa duha ka ka dagkong kadagatan sa Pasipiko ug sa West Philippine Sea, ang nagdagan nga sulog sa tubig dinhi, nagbisbis sa mga buhilaman ug nagpalungtad sa mga mananap nga nabuhi dinhi.

Sa saktong timpla sa tubig, dinhi usab igkita ang mga nindot nga gasang, antohong ug mga lusay nga talagsaon.

Sa tumong nga ipakatag pa ang mas lapad nga kasayuran kabahin niining mga nindot na usab nga kasinati-an, ang DIVE 7 Dive7 Travel Trade and Media Familiarization Tour dinhi sa Bohol magpadala sa mga batid nga manunulat, mga diver hobbyists, mga opisyal sa DOT, mga online influencers, bloggers ug mga tour and travel agencies.

Ang Dive 7 Travel Trade and Media Familiarization Tour didto magbase sa Bellevue Hotel ug sa South Palms ug Bohol Beach Club Resorts, diin may himoon nga mga programa, ug diin magsukad ang mga divers paingon sa ilang mga dives. (RAHC/PIA7 Bohol)