TAGBILARAN CITY, Bohol, May 30 (PIA) -- Wala na’y rekisitos pa nga gikinahanglan sa usa ka Bol-anon o magagikan sa Bohol nga mopaingon sa Manila.
Kini maoy gipadayag ni Provincial Administrator ug Bohol InterAgency Task Force (BIATF) Official, Atty. Katherin Pioquinto, taliwala sa mga pangutana kon unsa na ang kinahanglanon pang mga dokumento aron makagawas sa Bohol paingon sa Metro Manila, bisan sa nagpadayon pang hulga sa COVID-19.
Kahinumduman nga ang Manila anaa na sa COVID Alert Level 1 samtang ang Bohol nagpabilin pang anaa sa COVID Alert Level 2.
Daku na ang naabut sa mga vaccination teams sa Manila aron pasapongon ang kadaghanon sa ilang mga residente nga nabakunahan lapas sa 80% sa kinatibuk-an nilang populasyon.
Sa laing bahin, dinhi sa Bohol, anaa pa sa 71.57% ang naabut sa mga tigpangbakuna, sa kinatibuk-ang populasyon nga gitumbok nga pwede bakunahan.
Nagtuo ang mga eksperto sa sakit-mananakod nga kon makabaton na og panalipud ang labing baga nga hut-ong sa katilingban pinaagi sa pagpabakuna, mahikawan na niini ang mga kagaw sa pagsulod sa lawas aron magdala og sakit ug manakod.
"Wala nay rekisitos pa nga kinahanglanon kon mobyahe paingon sa Manila," saysay ni Atty. Pioquinto didto sa Viber group sa BIATF.
Apan, dugang niya, alang sa mga mosulod sa Bohol nga wala pa mabakunahi, magkinahanglang makapakita og resulta sa Reverse Transcription Polymerase Chain Reaction (RT-PCR) test results nga negative ug kinahanglang kini nakuha, sulod pa sa 72 oras.
Ang RT-PCR mao pa gihapon ang gisaligan nga pamaagi sa pagtumbok kon ang usa ka tawo, nagdala bas a kagaw nga maoy kinaingnan sa possible na usab nga pagtakod.
Hinuon, dili na kinahanglan pa ang negatibo nga RT-PCR kon ang mobyahe, menor de edad nga ubos sa 11 anyon ug nagbyahe kauban sa bakunado nga ginikanan o tigmatuto sa bata.
Sa mga bakunado na, andamon usab ang vaccination certificate o vaccination card, kay mahimo nga pangita-on kini sa pagsulod sa Bohol. (RAHC/PIA7 Bohol)
Comments
Post a Comment