TAGBILARAN CITY, Bohol, April 7 (PIA) -- Padayon nga nagkapiskay ang sitwasyon sa pagpakigbatok sa COVID-19 sa Bohol, dihang napakita niini ang maayong resulta sa pagkunhod sa mga kaso.
Niadtong Marso 1, pananglitan, ang Bohol nakatala na sa kinatibuk-ang 667 nga kadaghanon sa mga Bol-anon kang kinsa nga kinabuhi gipilde sa COVID, segun sa taho sa Bohol Inter Agency Task Force on the Management of Emerging Infectious Disease sama sa sakit nga COVID-19.
Kini human sa unang natala nga kaso sa kamatayon niadtong Mayo 2020.
Diha nay higayon nga ang kahadlokan nga sakit mokutlo og labing menos 6 ka kinabuhi sa matag adlaw, subay sa nasinati sa Bohol niadtong Septembre 2021.
Apan, sukad nga natala ang pagkunhod sa mga kaso dihang nabati na ang epekto sa pagpamakuna, padayon na ang pagtibugsok sa mga kaso.
Sa mga nanga-angin sa COVID ug nakuhaan sa kinabuhi gikan sa 667 niadtong unang adlaw sa Marso, mitala ang Bohol sa ika 681 ka kaso sa kamatayon human nakalabay ang 38 na ka adlaw.
Kini nagpasabut nga sa katapusang 38 ka adlaw, usa na lang ka tawo ang mamatay sa COVID-19 matag tulo ka adlaw.
Kini pa ang labing nindot nga napakita sa talaan sa Bohol sukad nakapanghasi ang COVID-19 dinhi niadtong 2020.
Sa mga natala nga aktibong kaso, niadtong Marso 1, napakita sa BIATF nga may 67 ka Bol-anon ang niadtong panahona, natakdan sa COVID-19 subay s akompirmasyon pinaagi sa laboratory tests.
May tulo usab ka bag-ong kaso nga natala niadtong adlawa.
Sa Marso 6, 2022 o human sa 38 na ka adlaw nga milabay, mitala ang Bohol og 6 na lang ka aktibo nga kaso sa COVID-19.
Sa Abril 6, katapusang taho sa BIAFT. Upat usab ka bag-ong kaso ang natal sa susamang higayon.
Sa kasamtangan, mikabat na sa 22,272 ka Bol-anon ang nangaayo sa 22,959 ka mga taga dinhi nga kompirmadong nasakit sa COVID-19.
Niini, anaa sa 97% na ang tsansa sa mga Bol-anon nga makarekober sa higayon nga ma COVID-19. (RAHC/PIA7 Bohol)

Comments
Post a Comment