LOAY, Bohol, Nov. 9 (PIA) -- Gikan sa usa ka manggi-uwawon nga bata, nabuntog ni Meriam Lagura, 25 anyos nga taga Sagnap, niining lungsod ang gapos nga nakapugong kaniya nga makig-atubang og daghang mga tawo.
Gawas pa nga natikangan niya ang pagsuway, may ikapakita na usab siya nga kita isip job-order worker sa Municipal Treasurer’s Office, niining tanan siya nagpasalamat sa Government Internship Program (GIP) nga tanyag sa Department of Labor and Employment (DOLE).
Usa ka gradwado sa Bachelor of Science in Education, naglaum si Meriam o Mime inga makasulod og trabaho isip maestra, apan wala pa miduyog ang kahigayonan.
Agi og pagpaabut, nagtaghuwat kini og pangita og kasudlang trabaho hangtud nga ming apply kini sa GIP nga tanyag sa DOLE.
Gipasabut ni DOLE Bohol officer in charge Angelie Salgados nga ang GIP programa sa kagamhanan sa pagpasuway sa mga trabahante sa pagpangalagad sa mga buhatan sa kagamhanan aron makat-on sa mga kina-iya, gimbuhaton ug makakuha sa mga abilidad sa pagpadagan sa opisina.
Daan na nga borong si Mimie, ilabi na kon bation niya nga labaw sa iyaha ang ikaatubang.
Apan sa GIP, nga gihimong tulay sa kagamhanan aron kahatagan ang kabataan sa higayon nga makapakita sa ilang talento ug kakayahan sa natad sa serbisyo publiko, sa pamasin nga ang mga labing maayong trabahante makapadayon na sa ilang serbisyo sa katawhan pinaagi sa buhatan sa kagamhanan.
Swerte si Mimie nga nadawat sa Munisipyo sa Loay human sa iyang GIP.
Didto ma assign sa Municipal Treasurer’s Office niadtong Spetmber 2020 ngadto sa Nobembre 2020, sa tulo ka buwan nga pagpakig atubang sa mga mamayad og buhis, mamayad sa tubig ug sa pagsubay sa mga balayronon.
Human sa pipila ka adlaw, hinay nga nakat-on si Mimie sa pagpakig-atubang sa tawo dala sa iyang trabaho.
Swerte pa si Mimie kay human sat ulo ka buwan nga internship, human sa napakita niyang maayong trabaho, nasurop siya sa LGU Loay diin hangtud karon siyang nagtrabaho didto.
Tungod usab sa iyang kasinati-an, mikuha pa siya og laing kurso pinaagi sa Technical Education and Skills Development Authority.
Gawas nga si Mimie nagtrabaho na sa munisipyo isip job order worker, nagkat-on na usab siya sa pagluto og pan ug mga pastries, butang nga matud niya, makatabang sa iyang pagpanimpalad pohon.
Niiing tanan, kon wala pa ang mga programa sa goberno nga gipatuman ni Presidente Duterte, hayan pabilin pa si Mimie nga natanggong sa balay samtang nagpaabut kanus-a makatrabaho, samtang naghambin sa kaburong.
Si Mimie usa lamang sa liboan ka mga estudyante nga nakasinati sa programa sa panerbisyo sibil, ug usa sa mga mihatag og testimonya sa gipahigayon nga Duterte Legacy Caravan sa lungsdo sa Loay. (RAHC/PIA7 Bohol)
Comments
Post a Comment