P5K manganak 4.625% PA sulod sa 5.5 ka tuig sa RTB

 

TAGBILARAN CITY, Bohol, Nov. 25 (PIA) -- Aduna kay P5,000 ug nangita kay puhunanan nga segurado ang tubo. Asa  ka paingon?

Matud sa Bureau of Treasury (BoTr) pinaagi sa ilang Officer in Charge nga si Chloe Redeja, adunay segurado nga negosyo nga gipasandig sa goberno, mao nga sigurado nga legit dire dapita.

Gipasabut ni Redeja ang Retail Treasury Bonds (RTB), nga maoy tinag-as nga kasegurohan sa puhunan kay kini nga kwarta nga gi-invest maoy gamiton sa goberno pinaagi sa Bureau of Treasury aron ikatanyag isip pautang ngadto sa mga ginagmay nga negosyante.

Ug sahi sa ubang pamuhunan nga may dagku kaayong saad sa ginansya, ang RTB adunay gikwenta na daan nga tataw nga interes, ug obligasyon sa republika sa Pilipinas nga iyang bayaran.

Ang mas daku nga puhunan, mas dako usab ang makuha nga interest, matud sa BoTr.

Dugang pasabut ni Redeja didto sa binuwan nga tigum sa mga Information Officers nga gisponsor sa Department of Social Welfare and development, nga ang RTBs, walay kuyaw ug sayon apilan nga pamaagi sa pagpaginansya, nga gipundohan ug gipasaligan sa goberno sa nasud.

Gitanyag alang sa ginagmay nga pamuhunan sa mga indibidwal ug sa mga kompanya nga nangita og mas taas nga interes sa ilang pamuhunan, ang RTB, gipasalig nga may taas nga interes nga labaw pa kay sa gitanyag sa bangko, matud ni Redeja.

Sa pagpamuhunan og labing menos P5mil, makahupot ka og bonds nga pabayloan sa kantidad ug interes nini sulod sa gitakdan nga panahon.

Mahimo usab nga kon gikinahanglan, kuhaon sa dili pa mahuman ang 5.5 ka tuig apan ang interes niini subay sa market value nianang panahon sa pagkuha.

Ang RTB gitanyag alang sa publiko sukad Nobyembre 15 ngadto sa Nobyembre 25.

Kini nga RTB mokita og 4.625% matag tuig sulod sa lima ka tuig og tunga  o taman sa Hunyo 2, 2027.

Mahimong mapalit ang RTBs pinaagi sa sistema nga over the counter diin buksan sa mamuhunan ang peso account human maka fillup sa Application to purchase ug Client Information Sheet ngadto sa BoTr isip selling agent.

Sa pagtunol sa gipamuhunan, moissue dayon ang BOTr og resibo, og magpaabut na lang og 30 ka adlaw alang sa confirmation of sale.

Mahimo usab kini nga himoon sa online ordering facility o sa mga Bonds.PH mobile applications. 

Sa dugang kasayuran, bisitaha ang Bureau of Treasury Bohol nga nahimutang luyo sa Gallares Hospital niining syudad. (RAHC/PIA7 Bohol)