TAGBILARAN CITY, Bohol, Nov. 25 (PIA) -- Gitumbok sa Bohol Inter Agency Task Force on the Management of Emerging Infectious Diseases (BIATF) nga ang pagpahimutang og mobile vaccination teams maoy labing maayong buhaton aron makapadali sa Bohol sa pagkab-ot sa giingon nga herd immunity.
Kini samtang sa 47 ka kalungsuran ug usa ka syudad sa Bohol, 20 niini ang may usa lamang ka vaccination site, 15 ka lungsod ang nakatukog og duha ka vaccination site samtang may 6 ka kalungsuran nga may 3 ka vaccination sites ug ang nahibilin nga pito, nakatukod og labaw sa upat ka vaccination sites.
Kini nga kasayuran mitumaw human gituki sa Bohol atul sa online nga tigum sa BIATF sa pagtubag sa pangutana kon ngano ug unsay rason nga hinay man ang dagan sa pamakuna sa Bohol.
Sa walo ka buwan na nga milabay, ang Bohol nakahimo lamang sa paghatag og kompleto nga bakuna sa 32% sa gitumong niining bakunahan nga 70% sa kinatibuk-ang populasyon niini.
Sukad sa Marso 6 kanus-a una nga nagsugod ang pamakuna sa mga nanarbaho sa sector sa kasanihan ilabina niadtong anaa sa medical front lines, hangtud Nobyembre 21, anaa pa sa 677,738 ka Bol-anon ang nabakunahan sa una ug kompleto nga dosage sa bakuna.
Sa gibanabana nga inadlaw nga kapasidad sa Bohol nga mobakuna sa 7500 ka tawo, namatud-an nga ang kasamtangan nga inadlaw nga accomplishment sa pamakuna sa Bohol, nag average lamang og 2,669 ka tawo.
Gitumbok nga sa diha nga nagpasugod ang pipila ka lungsod sa Bohol sa mga mobile vaccination teams, mingpaspas ang pamakuna, apan didli pa gyud igo nga mopasaka sa kadaghanon sa bakunado nga mga tawo.
Matud pa sa Department of Health (DOH) pinaagi ni nurse Neil John Oclarit, may usa usab ka lungsod nga may pribadong institusyon nga mi-abag sa pamakuna.
Ang pagpamakuna, maoy gitumbok sa mga batid sa kasanihan nga labing epektibo nga lakang sa pagpangontra sa coronavirus disease.
Matud pa ni Provincial Administrator Atty. Katherin Pioquinto, "kon magsalig lang gayud sa mga nahimutang nga vaccination sites, dili gyud dali nga makab-ot ang target sa Bohol nga herd immunity."
"Gikinahanglan ang dugang nga mga mobile vaccination teams nga maoy maka-adto sa mga hilit nga lugar aton mapataas pa nato ang atong mga ihap ug patas-on ang accomplishment," dugang ni Atty Pioquinto.
Ang tanan nga namatay sa COVID-19 dinhi sa Bohol, pulos mga walay bakuna, samtang giingon man nga may nataho nga namatay nga bakunado, kini nahibaw-an usab nga may mga sakit na nga daan nga giantus sa pasyente, nga wala na makaya pa sa bakuna sa pagbatok sa pagtakod sa COVID-19.
Karong hinapos sa buwan, giingon nga mosuway og kab-ot ang Bohol sa labingd aghang mabakunahan sa tulo ka adlaw dungan sa Enhanced Vaccination program nga mahitabo sa Nobyembre 29 ngadto sa Disyembre 1.
Giingon nga tumong sa Bohol nianang adlawa ang makadapat sa 79,000 ka bakuna matag adlaw. (RAHC/PIA7 Bohol)
Comments
Post a Comment