TAGBILARAN CITY, Bohol, Nov. 24 (PIA) -- Giaghat sa Executive Order No. 56, series of 2021 ang mga local nga kagamhanan sa Bohol sa pagpagawas og mga mandu aron ma-agni pa ang daghang mga tawo ga magpabakuna.
Kini samtang ang Bohol na-iwit na ug nagpabug-at sa accomplishment sa nasud sa pagpamakuna sa kasamtangan nga 32% pa lamang sa gitarget nga 70% sa populasyon sa Bohol ang bakunahan.
Kahinumduman nga nagpagawas si Gobernador Arthur Yap sa Executive Order No 56, series of 2021 aron ikapatuman ang Inter-Agency Task Force Resolution No. 148-B series of 2021 sa pagsagop sa whole of nation approach pagpa-aghat sa pagpabakuna.
Ang nahisgutan nga Executive Order, nagmandu usab sa pugos nga pagpabakuna sa mga trabahante ug lumulihok sa mga establisemento, publiko ug pribado man ilabi na niadtong mismo mangatubang sa kliyente ug customer.
Kini usab samtang gipamatuod sa National Vaccination Operations Center nga ang Bohol may igo na nga suplay sa bakuna.
Apan bisan sa kadaghan sa bakuna nga nangabut, kuwan pa gihapon ang accomplishment sa Bohol.
Niini, se Section 7 sa E.O. 56 series of 2021, gimandu na sa gobernador ang component cities ug municipal local government unit sa pagpagawas sa susamang mga mandu ug ordinansa aron ipasulbong pa ang pagpabakuna.
Niini, gitugotan ug giaghat ang mga LGUs sa pagtanyag og mga pahalipay o insentibo alang sa mga tawo nga nakakompleto na sa bakuna ug sa mga establisemento sa negosyo nga nagpatuman sa ilang kaugalingong mga programa nga nagsuporta sa pamakuna sa ilang mga empleyado ug kliyente o customer.
Gimanduan usab ang mga LGUs sa pagpangayo og kamatuoran nga bakunado na ang usa ka tawo aron makaapil sa mga kalihukan nga pagahimoon alang sa mga katawhan. (RAHC/PIA7 Bohol)
Comments
Post a Comment