BIATF: Parehas ra ang epekto bisan unsa’ng bakuna

 

ANG LABING MAAYONG BAKUNA. Kadtong bakuna nga anaa na ug andam na nga itupok mao gayud ang labing maayong bakuna, matud pa ni Provincial Administrator Katherin Pioquinto, taliwala sa taho nga daghan pa gihapon nga mga Bol-anon nga mamili sa bakuna. (PIA Negros Oriental File Photo)

TAGBILARAN CITY, Bohol, Nov. 26 (PIA) -- Ang labing epektibo nga bakuna, dili kadtong imong gipili, apan kadtong bakuna nga anaa og andam na nga ikatupok.

Kini pahinumdom sa mga tinugyanan sa Bohol Inter-Agency Task Force on the management of Emerging Infectious Diseases (BIATF) Strategic Communications Cluster sa labing uwahi niining online nga tigum, niining semanaha.

Kini mitumaw human ang BIATF mingtuki sa mga kasagaran nga rason nganong hinay ang dagan sa pamakuna sa Bohol.

Nataho nga samtang ang Bohol mikab-ot na sa 32% sa 70% nga gitarget niining bakunahan, ang sa tibuok nasud anaa na sa 45% ang nakab-ot sa iyang buot bakunahan batok sa coronavirus disease.

Gitaho usab sa nasudnon nga Inter Agency Task Force nga natapok na sa nasud ang sobra sa gikinahanglan aron kabakunahan ang 70% sa tibuok populasyon niini.

Apan, sa Bohol, nakita usab nga nagsalig lamang ang daghang mga kalungsuran sa usa lamang ka vaccination team nga gibutang sa usa  ka lugar diin moadto ang mga tawo aron magpabakuna.

Laing pa nga rason sa hinay nga pagpamakuna, kay daghan ang mipili sa klase sa bakuna nga itupok, segun sa taho didto sa BIATF.

Sa tanan nga mga bakuna gani, ang Sinovac, matud pa ni Provincial Administrator Atty. Katherin Pioquinto, ang may labing dyutay nga natala nga adverse effects.

Si Atty Pioquinto nagbase sa iyang pahayag sa mga resulta nga natigum sa Bohol Emergency Operations Center (EOC), nga maoy sentro sa mga hisgutanan ug operasyon sa pagpamakuna sa mga Bol-anon batok sa COVID-19.

Sa iyang kasinati-an, nagkahilanat, matud pa, si Pioquinto dihang nabakunahan sa us aka brand nga gikan sa nasud sa kasadpan.

Daghang mamili sa mga bakuna nga gikan sa Amerika ug sa nga nasud sa Kasadpan sama sa Astrazeneca, Pfizer, Moderna ug Johnson and Johnsons, segun pa sa taho sa EOC.

Ang tanan mga bakuna ng makuha sa nasud ug gipang-apud-apod, parehas nga nahatagan sa Emergency Use Authority (EUA) sa mga kasaligan nga ahensya lakip na sa World Health Organization.

Ang EUA usa  ka  pasalig nga ang bakuna nga itupok, dili makadaut ug mas makatabang sa lawas kay sa makadaut niini.

Segun pa sa BIATF pinaagi sa tigpamaba niini nga si Dr. Cesar Tomas Lopez, ang Bohol karon may mas daghan nga stock sa cold chain facilities niini nga Sinovac, kon itandi sa uban nga brand sa bakuna. (RAHC/PIA7 Bohol)