UBAY, Bohol, Nov. 10 (PIA) -- Kawhaan (20) ka mga taga Ubay nga nakaapil sa Special Training for Employment Program (STEP) sa kagamhanan ang mingdawat sa mga libre nga kagamitan sa pagluto, atul sa Duterte Legacy Caravan sa Ubay, Nob 10.
Sa espesyal nga seremonyas, sila Camille Marie Boiser ug Catherine Caparoso, mga scholars sa STEP nga gitanyag sa kagamhanan pinaagi sa Technical Education and Skills Development Authority (TESDA) ang midawat sa mga gamit samtang nakuha usab nila ang tag P160 nga inadlaw nga allowance nga gipataban sa 42 ka adlaw nga bansaybansay.
Mismo si TESDA Bohol Provincial Director Winnie Salas, uban ni Ubay Mayor Constantino Reyes ug Presidential Communications Operations Office Assistant Secretary Jusan Vincent Arcena ang mibarug agi og saksi sa pagtunol.
Ang STEP sa TESDA usa sa mga kapid an ka mga programa sa kagamhanan nga gipatuman ilawom sa Administrasyon ni Presidente Rodrigo Roa Duterte, aron padaghanon pa ang kaasidad sa katawhan nga makapanarbaho ug makasugod og negosyo.
Ang 20 ka mga nakadawat, mitapos sa kurso nga Cookery NC II sa TESDA.
Gipalanog usab sa mga nakadawat sa abag sa kagamhanan ang pasalamat ilabi na sa mga gamit nga ilang nakuha.
"Unsa pay pangitaon, makamao na nga moluto subay sa nasudnong sertipikasyon, hatagan pa og gamit?" sambat sa usa sa mga benepisaryo sa nahisgutang pabansay.
Dugang niya, gikan sa iyang allowance, makapalit na usab siya og mga materyales ug sahog para makasugod dayon sa iyang gilaraw nga online nga orders.
Ang Duterte Legacy caravan nahimo nga panahon nga ang mismo nga mga benepisaryo sa mga proyekto sa kagamhanan mao nay mopasalamat ug mopabati sa ilang kalipay sa mga programa nga nakahimo sa ilang kahimtang nga mas hamugaway. (RAHC/PIA7 Bohol)
Gibitbit sa TESDA ngadto sa Duterte Legacy caravan ang mga frontline services sa mga ahensya sa kagamhanan atul sa Pamana ng Pagbabago caravan nga maghatag sa katawhan sa higayonnga sila na usab ang makapasalamat. (PIA Bohol)
Comments
Post a Comment